Den Haag – Recientemente Embahador di Colombia sr. Fernando Antonio Grillo Rubiano a haci un bishita di cortesia na Minister Plenipotenciario, sr. Guillfred Besaril. Embahador Grillo Rubiano a wordo acompaña pa e Minister Plenipotenciario na embahada di Colombia na Hulanda, sr. Juan José Páez Pinzon.
Embahador Grillo Rubiano a expresa su entusiasmo como pais bisiña pa cera conoci cu e representante di Aruba na Hulanda pa trata temanan di interes comun entre Colombia y Aruba. Un tema hopi importante cu a wordo trata ta e aspecto di cuido medico den cual AZV ta hunga un rol pa cu patientnan cu mester bai Colombia pa tratamento medico.
Tambe embahador Grillo Rubiano a toca e tema di un curso online di Spaño pa esnan cu no ta di habla Spaño auspicia pa Universidad di Medellin cu ta dunando na ambtenaarnan di Aruba. Actualmente tin 10 persona di Aruba cu ta sigui e curso aki y mirando e importancia di e curso como vehiculo pa fortifica e lasonan entre Colombia y Aruba, lo ta bon cu e por continua.
Turismo for di Colombia pa Aruba tambe tabata un topico di combersacion, especialmente con pa stimula esaki y dune un dinamica interesante pa ambos Pais. Colombia ta buscando e manera pa engrandese nan industria turistico for di Hulanda y Europa. Comokiera cu Aruba ta un lider den area di turismo den Caribe, Colombia a indentifica Aruba como e partner corecto pa un colaboracion. Esaki lo ta e tema central di un evento “Traveling Through Colombia” cu lo tuma lugar den Marriott Hotel na Den Haag december proximo.
Minister Besaril di su banda a papia riba exportacion di productonan agricola y carni for di Colombia pa Aruba. Pa Aruba e ta sumamente importante pa busca tur formula posibel pa mantene e productonan aki na prijsnan rasonabel pa Pueblo. Nos no mester limita nos mes na importa solamente di Merca y/of Europa. Esaki sigur ta un factor cu ta afectando e poder di compra di e comunidad Arubano. E otro factor cu ta afecta ta, cu Aruba ta depende demasiado di importacion pues e conocemento den area di agricultura ta keda un tema interesante pa futuro di nos isla.
Por ultimo a papia di un bishita di un delegacion di Colombia dia 2 y 3 di maart 2022 na Aruba pa elabora riba temanan den cuadro di e relacion bilateral entre Colombia y Aruba. Colombia mescos cu Aruba ta enfrenta un problema grandi cu migracion for di Venezuela. Durante di e bishita aki Colombia lo ta extra interesa den un presentacion di e sistema di alarma di horcan cu Aruba ta usando. Colombia ta hopi interesa den e sistema aki pa e islanan di San Andres cu tambe ta vulnerabel pa horcan den e area Caribense. Embahador Grillo Rubiano a gradici Minister Besaril pa e combersacion ameno y di su parti lo hasi tur loke ta su alcanse pa mantene y sigui stimula e lasonan di hermandad entre Aruba y Colombia.
Nota pa redacion: E potret ta cortesia di Arubahuis