Durante e reunion publico cu a tuma dia 10 di november 2021 encuanto Serlimar. Tromp-Lee un biaha mas a accentua cu cada biaha cu trata Serlimar semper ta bin cu e mesun splicacion, esta cu e ta un sui generis y no por comparti cierto documento of informacion y cu Gobierno no mester mishi den dicho instancia. Riba su mes enberdad den practica esaki mester bay asina, pero nos no mester perde di bista cu Gobierno ta sera un contracto (DVO) cu Serlimar pa ehecuta un tarea cu ta responsabilidad di Gobierno. Dus na momento cu pa un motibo of otro Serlimar no por cumpli cu dicho contracto ta na su lugar cu Gobierno por informa dicon y con ta bay soluciona e problema concretamente.
Tromp-Lee a haci entre otro pregunta over di e carta di STA fecha 25 di oktober 2021 cu ta contene 15 punto y Minister a indica cu e ta haya cu e puntonan ta valido y cu gerencia lo bay atende cu nan. Na opinion di Tromp-Lee mirando cu e puntonan aki a pone cu e trahadornan a welga y cu Serlimar riba un dia no a cumpli cu e contracto cu pais Aruba, e ta spera cu e puntonan aki keda atendi debidamente. Durante su discurso Tromp-Lee a enfatisa cu nos no mester lubida cu un dia of mas sin cu Serlimar ta haci nan trabou por tin consecuencianan no desea pa henter nos comunidad.
Segun Tromp-Lee, mescos cu ne, hopi colega a puntra pa e lista di crediteuren di Serlimar y ki areglonan tin y cu ken. No obstante cu Tromp-Lee ta indica cu e ta compronde cu minister no kier “mete” den Serlimar indicando cu no por duna cierto informacion y cu e bewindsvoerder no ta desea di comparti dicho lista, pregunta ta keda ta con Parlamento por controla si no ta haya acceso na ningun informacion pa por forma su mesun opinion of saca nan propio conclusion. Esaki ta mescos cu e situacion caminda ex-Minister Lopez-Tromp ta bin Parlamento indicando yen di fechoria sin por substancia esaki.
E realidad ta cu Gobierno ta keda responsabel pa e maneho di desperdicio y si esun cu Gobierno a cera un contracto cu ne pa cumpli cu e tarea di ehecucion di parti di e maneho/tarea aki no por cumpli of ta den problema, Parlamento mester por keda informa debidamente y haya e documentonan necesario. Tromp-Lee a bisa cu durante di e reunion Minister a indica cu e por duna siguransa di trabou na e trahadornan te cu februari otro aña y cu porta hasta ta existi e risico cu Serlimar no lo ta existi mas, pesey mes e ta haya cu ta na su lugar cu Parlamento por pidi minister mas transparencia y mester duna mas informacion/documento pa nan por haci nan trabou. Pasobra ora sushi no keda recogi, ora trahadornan ta subi caya y ta bay den welga, ora trahadornan ta den inseguridad, ora nan no tin paz laboral ta na Gobierno of na Parlamento nan ta bin. Ora Serlimar no por cumpli ta cerca nos pueblo ta bin. Ta anos nan ta pone responsabel y no gerencia y Raad van Toezicht di Serlimar.
Tromp-Lee ta bisa cu ta pesey mes e ta di opinion cu loke tin na informacion financiero, na documento, na plan etc, mester por keda comparti cu Parlamento pa nos por haci nos trabou di control. Pasobra yegando na e origen di e investigacion forensico andando den Serlimar, con ami como Parlamentario por sa loke ta sosode den Serlimar si mi no tin acceso na ningun informacion. Asina mes e stigma ta keda poni riba nos como Parlamentario cu nos mester tabata sa y no a controla.
Ta bon pa pueblo realisa cu esaki na e momento aki no ta posibel mirando e identidad legal di Serlimar cu ta un sui generis. Ta bon pa pueblo sa cu tanten cu e minister en cuenstion no haya sa y dicidi di informa Parlamento nos no sa di nada. Durante di e reunion di diaranson ultimo un biaha mas ta keda demostra cu hopi no por comparti cu Parlamento pasobra ta trata di un sui generis cu gobierno no por “mete” aden y tambe door di e situacion di surseance van betaling. Mas bien nos mester educa pueblo cu esnan responsabel pa e compania ta e gerencia y e Raad van Toezicht. Cu den pasado enberdad politiconan a mete den Serlimar porta berdad pero esey tabata cu consentimento di gerencia y di Raad van Toezicht.
Parlamentario Tromp-Lee ta finalisa bisando cu e servicio pa cual ta cera contracto cu Serlimar, esta pa percura pa nos Aruba ta keda limpi ta, uno esencial y pesey mes mester percura pa e compania aki ta draai optimalmente caminda ta cumpli cu tur regla di bon gobernacion. Cu mester tuma decisionnan drastico y necesario nos no por descarta.