Home Politics Mike Eman: STATEN UNANIMAMENTE TA SOSTENE PRESERVACION DI AZV

Mike Eman: STATEN UNANIMAMENTE TA SOSTENE PRESERVACION DI AZV

SHARE

Den e reunión publico di Parlamento tratando recorte di 60 miyon florin riba AZV y preocupacionnan di e Asociacion di Fysioterapistanan hopi a comparti nan preocupación cu preservación di AZV.

 

E Líder di Fraccion di AVP, mr. Mike Eman, a substancia, cu un cantidad di motibonan fundamental, e necesidad di mantención di AZV y su principionan di accesibilidad pa cuido, Tambe a pone central e pensamento di solidaridad cu ta parti fundamental di AZV. Den e espirito aki Eman a presenta un moción pa preservación di AZV cu a haya sostén unánime den Parlamento.

 

E moción ta invatisa cu te na e momento di introduccion di AZV tabata tin diferencia grandi den e aceso na cuido medico. Promer cu AZV e cobertura tabata leuw di completo y esnan cu mas entrada por a gosa di un seguro medico priva y cuido medico di trahadonan y nan famia tabata basa riba un pp-kaart cu no tabata tin un paquete manera AZV tin awe y tampoco e derecho general como base di accesibilidad. Tabata tin un grupo grandi di ciudadano cu no tabata tin ningun forma di seguro medico.

 

E moción presenta dor di mr. Mike Eman a mustra cu seguro medico general (AZV) a wordo crea na comienso di siglo 21 cu e meta pa sigura cu tur ciudadano di Aruba, independiente di su entrada financiero, di su status laboral, di e sector di su trabou, edad o nacionalidad, bou tur circunstancia lo tin aceso na e mihor cuido medico cu nos pais ta ofrece.

 

Den concidearcion di e moción ta mustra cu for di comienso tabata conoci cu apesar di e solidaridad di esnan cu por contribui y esnan cu no por of por solamente poko, y apesar di e contribucion di tur trahado y dunado di trabou na e fondo di AZV pa medio di primanan mensual, gobierno probablemente lo mester a duna un contribucion adicional na e fondo, pa sigura cu tur ciudadano, trahado y no trahado y nan famia, semper lo ta sigura den forma igual pa e mes un bon cuido medico.

 

Eman a invatisa den su discurso presenatando e moción cu e principionan aki pa garantiza cuido medico pa un y tur, cu contribución di donjo di trabao, empleado y gobierno a base di principionan di solidaridad a resulta un formula di gran valor pa e pueblo di Aruba. Pesey e moción ta conclui cu e decisión pa pa urgi gobierno, den su buskeda pa formanan pa garantisa sostenibilidad di AZV, pa bou tur circunstancia preserva AZV y e principionan di accesibilidad, solidaridad y igualdad, cu semper a forma e base di e seguro medico pa tur na Aruba. Solidaridad di esnan cu tin e forsa financiero cu esnan cu no tin pa duna e contribucion necesario na e fondo di AZV. Y igualdad den e aceso na y den e cobertura di cuido medico di tur ciudadano. 

E moción aki presenta pa Líder di Fraccion di AVP, mr. Mike Eman y su fraccion a worde accepta unanimamente. Es decir cu den tur ehercisio gobierno lo mester tene cuenta cu Parlamento den su totalidad kier preservación di AVZ y su principionan di accesisibilidad y solidaridad.