Durante e conferencia di prensa di dialuna mainta, Prome Minister di Aruba a papia di e sucedido na Azia Restaurant, e la splica cu ta trata di casa di parlamentario Gerlien Croes y su ruman. Ambos ta yiu di lider di e partido politico Pueblo Prome.
E problema a start den Gusto Night club caminda Nigel Williams lo a tira Kevin Wever cu cerbes. Kevin ta yiu di Prome Minister di Aruba, Sra. Evelyn Wever Croes.
E problema a sigui y a bin caba den Azia Restaurant e yiunan di Williams lo a dal e yiu di nos Prome Minister dos biaha di tricion. Tambe nan a comete varios destrucion y te hasta a herida un trahado, cu no tin nada di haber cu e problema.
Palm Beach: Diadomingo for di trempan den anochi, Nigel Williams tabata den Gusto Nightclub den compania di algun persona mas. Na momento cu e la mira e Kevin y su pareha den Gusto. Esaki no a cay den den bon tera cerca Williams. Nigel lo a cuminsa busca Kevin problema y a tire cu un botter di cerbes, muhando Kevin su paña.
Kevin pa evita mas problema a dicidi di bandona Gusto Nightclub y bay dinner cu su pareha na Azia Restaurant. Pa e Williamsnan si e problema no a caba, no tabata suficiente cu nan a agredi di triciony a muha Kevin su paña cu cerbes.
Despues di basta rato nan a nota cu Kevin tabata na Azia Restaurant comiendo cu su pareha. Aki e Williamsnan y algun amigo a drenta den e restaurant y dilanti di tur otro clienten, nan lo a cuminsa comete destrucion. Durante cu nan tabata destruyendo un cantidad di glas, un empleado a keda herida cu un corta basta profundo na su man.
Mesora a bati alarma y varios unidad di polis a wordo pidi cu urgencia na Azia Restaurant. Na momento cu e Williamsnan y nan amigonan a scucha cu polis ta na caminda, nan no a keda pa para responsabel pa nan actonan, pero a core bay direccion di Hilton hotel. Na Hilton nan a mira cu un security tabata tin bista ribanan, e rumannan Williams cu nan amigonan a core drenta e parkinglot di The Village y aki nan lo a subi den un Honda Pilot y a bay for di eybanda. Polis a tira bista pero ya nan a huy for di e sitio.
Ambulance a wordo pidi na e sitio pa atende cu e trahado di Azia Restaurant cu a keda herida. Na yegada e paramediconan a trata e victima na e sitio y despues a transport’e pa hospital.
Den Gusto y na Azia Restaurant tin un cantidad di camara di siguridad cu a capta kiko a sosode. Tambe Polis a tuma declaracion di tur e testigonan y tambe di Kevin Wever kende a wordo agredi y tira cu cerbes.
E caso aki ta bou investigacion y autoridad pronto lo por pone e grupito di agressornan aki responsabel pa nan actonan. Ta basta destrucion a wordo cometi y tambe e clientenan cu a wordo stroba di nan dinner. Un keho oficial a wordo entrega contra e rumannan Williams y nan amigonan.
