Home Corte Fiscal a exigi 3 aña di prison pa homber cu a abusa...

Fiscal a exigi 3 aña di prison pa homber cu a abusa di mucha di 14 aña

SHARE

ORANJESTAD – Awe mainta e homber T. (29) a presenta dilanti Hues pa e caso penal cu Ministerio Publico a cuminsa contra dje.

Aruba Native por a compronde cu Fiscal a haya T. culpable di a mishi y hasta penetra cu su dede un mucha muher di 14 aña. Ta asina cu T. a desmenti di a mishi y penetra e mucha. El a bisa cu ta e mucha a bay riba dje pa sunchi y el a pusha e mucha.

E acusacion cu Fiscal a presenta contra T. ta cu entre 1 Maart 2020 y September 2020, el a mishi cu e mucha y penetra e mucha cu su dede.

Den sala di Corte tabata presente e mama di e mucha, kende a haci demanda di daño contra T.

Hues a mustra cu T. su pareha a trece su ruman chikito biba serca nan na un cas di dos pisa. Na e cas tabata biba tambe e mama di e pareha di T. Segun e mucha, T., kende e tempo ey tabatin 28 aña, tabata blo wak e. El a bisa cu e tabata abao den e promer piso y T. tabata hunga play station. Na dado momento T. a bay riba dje y mishi cu su pecho. E mucha a reacciona y T. a bis’e pa no bisa nada. Segun e mucha, e actitud aki di T. a keda ripiti varios biaha y hasta un biaha T. a hinca man den su panty y a penetra cu su dede su parti intimo. E mucha a bisa Polis cu e abuso a manera bira un costumber, siendo cu esaki ta contra di su voluntad.

Un dia, e mucha a haya problema na school y e ora ey el a basha abou na maestra di school. E ora ey e maestra a informa e mama. E ruman muher a bay serca e victima y e victima a conta tur cos. E ruman a reclama T. y bisa cu como adulto (28) mester sa cu no por mishi cu mucha. El a reclama T. cu e tin un yiu muher y con e por haci algo asina.

Hues a mustra cu tin chatnan di whatsapp, caminda e ex partner tabata yama T. pa pedofile y reclama T. pa loke el a haci. T. a bisa cu awor ta culp’e pero ta e mucha a cuminsa. E ex partner a bisa T. cu e no mester a mishi cu e mucha mes. Hues a mustra cu T. mes ta admiti di a mishi cu e parti intimo di e mucha. Hues a mustra cu T. a bisa su ex partner cu el a resa hopi pidi Dios pordon pa loke el a haci. Hues a bisa cu for di e chatnan por conclui cu T. a mishi y a penetra e mucha.

E mama a entrega na Hues documento cu e demanda. E daño inmaterial el a exigi 6 mil florin. Hues a lesa e carta cu tabata hunto cu e documento caminda psycologo ta splica cu e mucha ta bou tratamento psycologico. E mucha tabata den un crisis pisa cu intension di kier mata curpa. Psycologo ta mustra cu e mucha a mantene silencio tur e tempo pa evita crisis den famia. El a mustra cu e mucha ta bou tratamento. Tambe e mama ta demanda 2500 florin como gastonan di abogado.

Fiscal a bisa cu ora e ex partner a reclama T. di a hinca dede den parti intimo di e mucha, T. no a bisa nada. Segun Fiscal, T. a bisa e ex partner cu despues di esey, el a stop y no a haci nada mas. Fiscal a bisa cu e no ta kere e storia di T. cu e mucha di 14 aña kier tabatin relacion cun’e. El a bisa cu si a caso algo asina pasa, T.(28) mester a par’e y bisa su ex partner. Alcontrario, T. no a bisa su ex partner nada.

Pa loke ta e demanda di daño inmaterial di 6 mil florin, e ta haya esaki acceptable. Pa loke ta e demanda di gasto di abogado, Fiscal ta haya cu esaki no ta acceptable. El a pidi Hues pa aplica e tarifa pa yena un demanda cu ta 176 florin. E resto di 2500 florin ta wordo declara no admisibel.

Fiscal a exigi 3 aña di prison di cual 6 luna ta condicional cu un tempo di prueba di 3 aña. Fiscal a bisa cu e ta exigi tambe pa prohibi T. pa drenta den contacto cu e mucha.  

Hues a bisa cu e ta bay studia e caso y dia 3 December 2021 lo tin sentencia.