ORANJESTAD – Awe mainta Hues di Corte di Husticia a dicta sentencia den e caso penal cu Ministerio Publico a cuminsa contra e mama di un mucha, J.G. y e mama di J.G., I.R.G.
Aruba Native por a compronde cu e mama y e wela a bati e mucha formal cu waya di coriente.
Nan caso a wordo trata algun siman pasa, caminda nan ta wordo acusa di a maltrata un mucha malamente. Den e caso aki ta trata di e yiu di J.G., kende a bay school cu marcanan di maltrato na su mannan y curpa.
Asistencia di Polis a wordo pidi na e school, caminda maestro di school a constata cu un mucha tabata severamente maltrata. E mucha a conta cu el a wordo maltrata pa su mama y su wela. Por a mira riba curpa di e mucha rascanan di waya y hasta tabatin herida cu a cria casca.
Investigacion di Polis a mustra cu e mama J.G. y e wela I.R.G. a bati e mucha cu waya di coriente. Durante interogacin di Polis, e mama y e wela a admiti di a maltrata e mucha, un tras di otro. Promer e mama a maltrata e mucha cu waya. Despues ta e wela a sigui caminda e wela a admiti di a dal e mucha 5 biaha cu e waya di coriente riba su mannan. E wela a bisa cu el a haci esaki pa e mucha sinti un tiki dolor.
Hues den su sentencia ta mustra cu e ta haya tanto e mama como e wela complice di maltrato di un mucha cu waya di coriente. Hues a condena tanto e mama J.G. como e wela I.R.G. na 2 siman di prison condicional cu un tempo di prueba di 2 aña. Tambe Hues a condena nan na 60 ora di trabou pa comunidad y si no cumpli cu esaki, nan lo mester bay sera pa 30 dia den prison.
Cu esaki Hues kier mustra cu no ta tolera pa mayor ta maltrata su yiu di e forma aki.