Home Corte 16 aña di prison exigi pa asesinato na Brazil

16 aña di prison exigi pa asesinato na Brazil

SHARE

 

ORANJESTAD – Awe merdia Corte di Husticia a sigui cu tratamento di e caso penal cu Ministerio Publico a cuminsa contra Pascual Brown (22) kende ta wordo acusa di a tira mata Richi Henao Tavarez (20) riba 12 di April 2021. Esaki a sosode na Brazil.

Aruba Native a compronde cu algun siman pasa a trata un parti di e caso y a pospone pa e raport di psychiater. Durante tratamento di e caso algun siman pasa, Huez a bisa cu 12 April 2019 anochi, Polis a bay na Brazil caminda un hende a worde tira den cabez. Richi Tabares tabata sinta den veranda. Autopsia a mustra cu door di tiro den cabez. A haya bala den su cabez. Investigacion mustra cu e bala ta di un revolver Cal. 38. Bisiña di Richi tin camera y Recherche a haya imagennan di camera pa investiga. Nan a mira un Nissan March righthand drive yega den vecindario di e cas di Richi y por a mira e chofer. E persona tabatin un pechi cabey largo y a baha for di auto cu algo parecido na un arma den su man drechi. El a cana gebuk den direccion di cas di Richi. Despues e ta core bek gebuk drenta den auto y core bay.

Awe merdia Hues a mustra cu psychiater ta conclui cu Brown ta sufri di problema mental y esey a causa cu el a tira Richi mata. Psychiater ta papia di paranoid caminda Brown lo ta scucha stemnan ta papia cun’e.

Fiscal a bisa cu cu Richi (20) a wordo asesina ora e tabata sinta den veranda cu su partner.

Sin ningun motibo, Brown a tira Richi, sanger friu mata den cabez. Fiscal a bisa Hues cu e ta haya cu premedita Brown a tira mata Richi. El a mustra cu segun sentencia di Corte Supremo e hecho cu e sospechoso tin un problema mental, no ta motibo pa bisa cu e no ta culpable. El a mustra cu Brown a sali for di Playa bay te Brazil. Na caminda el a haya un arma di candela. A dura 15 minuut promer cu el a yega na e cas. Fiscal ta haya cu Brown tabatin tur tempo pa para y bay bek. El a bay scondi na e cas pa no wordo mira. El a tira Richi mata y gebuk a core bay bek den auto.

Fiscal ta haya cu esaki ta un ehempel di asesinato sanger friu. Na opinion di Fiscal, asesinato ta un di e delitonan di mas serio. Brown a mata Richi lagando atras un mucha chikito. Fiscsal ta tuma Brown na malo pa loke el a haci. Fiscal a remarca cu Brown no a mustra cu ta duel’e loke el a haci. Teniendo cuenta cu e raport di psychiater, el a exigi 16 aña di prison.

Hues despues di a scucha abogado a bisa cu e ta bay studia e caso y dia 2 December 2021 lo tin sentencia.