Home Politics Segun Ryçond Santos do Nascimento di partido AVP: maneho di integridad di...

Segun Ryçond Santos do Nascimento di partido AVP: maneho di integridad di MEP ta puro scuma

SHARE

 

Bao gobierno di Gabinete Wever-Croes I un estudio a ser haci pa cu cumplimento di e principionan basico di bon gobernacion corporativo den e sector publico y semipublico. Themis Institute for Governance & Leadership a publica e resultadonan di e estudio dia 20 di december 2020. E conclusion ta cu casi mita di e organonan di supervision y mas cu 40% di nos entidadnan publico y semi-publico no ta cumpli cu e normanan di mas minimo di bon gobernacion. P’esey parlamentario Ryçond Santos do Nascimento a dirigi preguntanan na varios minister en relacion cu nombramentonan di personanan cu vinculo estrecho cu e partidonan di coalicion, cu ministronan di e actual Gabinete de Wever-Croes II of personan pa cual tin duda pa cu nan integridad. Parlamentario Santos do Nascimento a mustra riba e conflicto di interes miyonario cu Minister Endy Croes tin como minister encarga cu deporte y a puntra pa splicacion encuanto e procedura di nombramento di R. Maduro, cu ta un ex candidato di MEP, y M. Varis den Hunta di Supervision di Fundacion Lotto pa Deporte. Tambe a haci pregunta encuanto e procedura di nombramento pa cu e director nobo di Utilities Aruba N.V., señor Anthony Rojer cu segun media tambe ta un ex candidato di MEP. Den caso di WEB nos por mira e mesun fenomeno, na unda aparentemente nos Pais solamente por haya personan califica den seno di partido MEP y famia. Mientras tanto e tremendo makinaria di mercadeo di MEP ta sigui produci scuma y bende un producto sin contenido: ta papia hopi di bon gobernacion, pero hecho ta cu nos ta bay pa cinco aña cu ainda nos no a mira e Corporate Governance Code priminti, no tin maneho por escrito encuanto integridad den e aparato gubernamental y nombramento dudoso ta sigui na ordo di dia.