Home Politics Partido MEP: MARISOL SPIRITO A YAMA REUNION DJEY BIAHA SIN AVISA 

Partido MEP: MARISOL SPIRITO A YAMA REUNION DJEY BIAHA SIN AVISA 

SHARE

E trabou di un Parlamentario ta hopi importante. Specialmente si tene na cuenta cu ta e tarea di Parlamento pa eherce e trabou di control.

Sra. Spirito cu tanto a grita di integridad, di spiritonan cu supuestamente tin contract pero no ta traha, awe a duna e miho ehempel di kico e spirito ta. Sra. Spirito a saca dos asiento den eleccion ultimo campañando cu spirito. Awe e mes tabata e spirito fantasma. 

 

Manera por mira e carta adhunto, Sra. Spirito a yama un reunion cu caracter di urgencia. Parlamento cu a duna oido na su yamada, a honra su peticion inmediatamente pa despues mester constata cu Sra. Spirito lo a subi “Spirit Airlines”. El a biaha sin avisa Parlamento, sin pidi permiso. Minister President a duna oido na su yamada. Minister di Salubridad a duna oido na su yamada. Ambos a presenta den Parlamento pa despues resulta su Sra. Spirito tabata e gran ausente.

 

E ta un indicacion si con na serio Sra. Spirito ta tuma su trabou. E mas tristo ta cu el a tuma e Asociacion di Fysioterapeutanan di Aruba. El a reuni cu nan, engañanan, hunga cu nan preocupacionnan, haci ful un obra teatral dramatico, pa resulta cu e tabatin e asociacion aki asina na serio cu e no a ni presenta pa e reunion cu e mes a yama.

 

Pero un ex Minister, awor Parlamentario, un politico cu ta capas di horta laptop di Gobierno di Aruba; un mandatario cu ta suppose di sa miho, cu mester “walk her spirito talk” y “lead by example” awe a wordo desenmascara den su propio comedia. Su unico interes ta su salario mensual, su posicion como parlamentario, e laptop di gobierno, y ningun responsabilidad ni respet algun pa ta e representante di su votadornan cu el a haya a base di grito fofo y engaño.