Home Politics Parlamentario Setty Christiaans-Yarzagaray (MEP): Recuperacion economico di casi 14% ta pa Aruba...

Parlamentario Setty Christiaans-Yarzagaray (MEP): Recuperacion economico di casi 14% ta pa Aruba un bendicion si of no?

SHARE

Desde cu Comision fiho di Finansas, Organisacion Gubernamental, Cultura y Deporte di Parlamento a reuni cu colegio di supervision financiero di Aruba (CAft) parlamentario Setty Christiaans-Yarzagaray tin e pregunta si Aruba tin un recuperacion asina mas miho cu a anticipa ta dicon esaki no ta parce di ta un bendicion pa Aruba?

Durante e reunion aki y den nan conferencia di prensa CAft a trece dilanti e instancianan cu nan a sinta cu nan pa ricibi informacion tocante Aruba su ultimo desaroyonan. Informacionnan cu CAft a comparti den publicamente ta cu segun CBA, Aruba a recupera economicamente cu 13.9% y ta premira un recuperacion di 7.1% den 2022. E resultadonan aki a surpasa tur expectativa. Segun fuente di AHATA Aruba su cambernan di hotel ta ful yen pa e temporada di fin di aña. A spera inicialmente un nivel di recuperacion di 40% di cantidad di bishitante di aña 2019 segun IMF pero Aruba ta yegando casi 75% caba.

Tumando nota di e grado di desempleo tambe a remarca cu e recuperacion economico ta duna su señal positivo en especial den e sector di di construccion y hotelero mirando cu ya tin mas necesidad di empleo. Tambe compartiendo di informacion cu SVB, miembronan di CAft a indica cu ta notabel e recuperacion basa riba e cantidad di hende cu tin asistencia di FASE y Loonsubsidie.

Cu Aruba falta pa recupera ta un hecho! Cu Aruba mester pensa bek riba puntonan di maneho y reformanan fiscal y finansas publico ta sin duda. Desde e pandemia di Covid-19, ta tur persectiva y metanan cu ta desea di logra pa Aruba a cambia y ta conoce retraso. Awor tur enfoke ta riba recuperacion no solamente pa Gobierno si no pa comercio y pueblo den su totalidad.

Pa e motibonan aki tambe presupuesto di pais Aruba ta cayendo poco laat pa cual motibo CAft a trece tambe dilanti como un punto di atencion y preocupacion. Pero tambe CAft ta conseha Aruba pa pone un stop na asistencia di FASE y Loonsubsidie. Den tur e consehonan aki a yega tambe riba e punto di gastonan di AZV y e recorte conseha pa CAft cu a wordo adopta tambe den e condicionan di Hulanda pa Aruba por ricibi asistencia financiero di likides.

Aruba tin hopi potencial segun e voorzitter di Caft mirando cu Aruba tin un bon producto turistico y cu pa depende di Aruba mes con e ta prepara su mes pa futuro y futuro generacion. Pero loke Parlamentario Setty Christiaans-Yarzagaray no por comprende ta, cu hustamente ta esfuersonan sobre humano di no solamente Gobierno, pero sector priva y pueblo henter ta resultado pa e recuperacion registra awe. Pero apesar di tur esaki, e bendicion aki, toch basa riba CAft su consehonan, Aruba te ainda no por logra haya un aprobacion pa un ultimo tranche di sosten di likides pa termina aña 2021.

Pakico esaki ta incomprendibel, paso ta facil pa realisa cu un recuperacion di economia awe, no ta traduci su mes den entrada den caha di gobierno di inmediato. Si no esaki tambe lo traduci su mes na un otro momento den futuro. Pues awor por pensa si ta asina un bendicion pa ta “de braafste van de klas” y tuma e responsabilidad serio pa percura pa un recuperacion tumando nota di e consehonan di CAft y Hulanda. Como Arubiano y sigur como Parlamentario ta un orguyo pa sa si cu Aruba ta un di uniconan como isla cu ta experenciando e recuperacion aki paso esey ta indica den tur sinceridad, cu Aruba ta haciendo e bon!