ORANJESTAD: Durante Conferencia di Prensa di Gobierno di Aruba, Minister di Enseñansa y Deporte sr. Endy Croes, a elabora levemente riba e topico di “Openbare Avondleergangen Aruba” (O.A.A).
Minister Endy Croes a informa cu ta trahando riba un rapport pa asina por tin un miho bista riba e maneho di O.A.A. Pa cu esaki Minister Endy Croes a pidi varios stakeholders den e area aki, entre otro, Inspectie Onderwijs y Directie Onderijs pa duna conseho di con pa sigui padilanti cu O.A.A.
Directie Onderwijs a scucha tur stakeholders pa asina traha un rapport cual lo conduci como conseho pa Minister pa asina por tuma un decision final unda O.A.A. lo bay resorta y den ki forma prome cu bay over na habri O.A.A bek.
E titular di Enseñansa a duna di conoce cu e rapport final lo mester a wordo entrega siman pasa pero lamentablemente no a logra concretisa esaki. Tin informacion cu e rapport aki lo yega na Ministerio di Enseñansa e siman aki na unda expertonan lo analisa e resultado pa asina por tuma e miho decisionnan.
Minister Endy Croes a enfatisa e importancia y deseo pa tin trankilidad den e veld di Enseñansa. Gobierno ta sinti cu e comunidad tin falta pa educacion pa adulto y lo anuncia e fecha di comienso di e enseñansa aki manera e rapport keda cla y e decisionnan wordo tuma.
Minister Croes a sigui bisa cu tur decision cu wordo tuma ta na bienestar general di esnan cu kier sigui e estudio y esnan den e veld cu ta duna estudio structuralmente, pa esaki ta sostenibel.
“Un poco mas pasenshi. E tema aki tin nos atencion mescos cu e demas problemanan cu nos a encontra y a resolve caba. Esaki tambe ta un di nan pero nos lo resolve tambe na un manera structural, Minister Endy Croes a termina bisando”.