Home Politics Parlamentario Shailiny Tromp-Lee (MEP):  Awe kier hunga critico y kier haci...

Parlamentario Shailiny Tromp-Lee (MEP):  Awe kier hunga critico y kier haci manera ta marioneta nos ta pero ora nan a sera presupuesto cu deficit astronomico no a pensa riba consecuencianan pa awe

SHARE

Durante reunion publico nr. 9 tratando e recorte di 60 miyon di AZV oposicion a papia y cuestiona pakico e recorte den AZV ta necesario. Durante nan discurso nan a sugeri manera cu ta nos mes a planea e recorte aki, manera ta nos mes a stipula e cambio aki. Nan a bin hunga cu emocion di pueblo durante un reunion hopi delicado. Ohala nan por a scucha nan mes y conseha nan mes durante gobernacion di Gabinete Mike Eman I y II ora cu nan tawata sera presupuestonan cu deficit astronomico!

 

Nan a crea un debe di 2,2 biyon florin y awe kier bin papia di preocupacion y ayudo na tur grupo vulnerabel. Nan mes a sigura pa e haci e grupo vulnerabel aki mas vulnerabel ainda door di tuma desicionnan descabeya ora ta trata nos presupuesto. Ta un lastima pa mira con ta haci uzo di palabra bunita y ta haci manera tin e grupo aki na curason pero ora tawata na poder a scoge pa ignora tur señal pa crea sostenibilidad y durabilidad pa cu nos sistema di Seguro AZV. Si nan a tuma decisionnan y accionnan concreto awe e situacion di AZV lo tawata otro. 

 

AZV no ta bou di presion desde ayera, n’i desde 2020. AZV ta bou presion desde basta aña caba! Na 2010 e gastonan di AZV tawata 220 miyon florin, na 2020 esaki a bira 448 miyon, y e proyeccion ta mustra cu pa aña 2035 esaki lo ta 703 miyon florin. Realidad ta cu poco poco e fondo aki ta bira impagabel y ta rekeri di un maneho dirigí pa garantísa su continuidad. Pues nos tin un problema di sostenibilidad grandi y e patronchi aki no por continua y ta nos deber pa percura pa e fondo aki ta keda existi pa nos futuro generacion. Alabes nos mester percura tambe pa cuido accesibel y di calidad cu na mes momento mester percura cu e fondo ta traha eficiente y eficaz. 

 

Oposicion a insinua cu Gabinete Wever-Croes tawata kier ta ‘braafste van de klas’. Pero mi ta convenci cu Gabinete Wever-Croes ni AZV na ningun momento kier ta ‘braafste van de klas’ pero si nan kier ta responsabel. Nan tawata kier a cuminsa tuma e pasonan concreto pa garantisa e continuidad di AZV y pa es motibo ey a laga haci e rapport cu oposicion ta maluza awe. Realidad ta cu no obstante e situacion grave ocaciona pa e pandemia, Gobierno mester actua responsabel. Lastimamente no tur ora tuma e decision corecto y responsabel ta nifica tuma e decision popular.