Cu e reactivacion di turismo di crucero rond mundo despues di un interupcion abrupto causa pa e pandemia di Covid-19, companianan a reactiva nan actividadnan den mita di 2021. Aruba tabata entre e prome paisnan pa habri su puerto bek pa bishitantenan di e mercado aki.
Actualmente tambe a cuminsa bek cu conferencia y reunionnan presencial pa por discuti posibilidadnan y oportunidadnan, pero tambe retonan cu tin tanto di parti di e industria y di banda di e destinacionnan y e producto y servicionan ofreci. Aña 2021 ta keda uno cu hopi reto. E lineanan crucero ta adaptando nan itinerarionan continuamente pa ofrece e miho opcionnan na nan clientenan teniendo na cuenta e situacion di cada destinacion relaciona cu e efectonan di e pandemia, den nos region y mundialmente.
Aruba Tourism Authority (A.T.A.) y Aruba Ports Authority (APA) a participa na dos di e conferencianan mas importante pa e segmento di turismo aki recientemente. Ta trata aki di e conferencia Seatrade Cruise Global na Miami na september y Florida-Caribbean Cruise Association (FCCA) Conference cu a tuma luga na Panama den luna di october.
E cantidad di bishitanan di barco pa Aruba ta subiendo gradualmente. A cuminsa cu tres na luna di juni ultimo y pa november por wak un subida importante cu 30 bishita. Ta premira cu e total di bishitanan pa 2021 lo yega na e cantidad di pasahero di e nivel di e “scenario optimista” cu tabata den e planning di recuperacion di e industria di turismo pa nos isla.
E efectonan di e pandemia lo sigui afecta e negoshi di crucero na 2022, pero lo sigui mira recuperacion y consolidacion di e industria. Lineanan di crucero ta premira cu no solamente lo sigui aumenta e grado di ocupacion riba cada barco, pero cu tambe ta sigui activa e barconan den nan flota cu awo ta inactivo ainda.
Manera e situacion ta actualmente, e desaroyo di e pandemia y e forma cu ta adaptando na e presencia di e virus, ta premira cu pa 2023, e industria di crucero lo yega bek na e nivelnan cu a conoce na aña 2019.
Aruba semper a haci esfuersonan adicional pa stimula actividad di barconan crucero den e region zuid di Caribe y pa realisa un miho oferta regional y atrae mas barco, ta crea aliansanan entre destinacionnan, incluyendo Corsou, pero tambe cu destinacionnan manera Panama y Colombia. A haci uzo di e oportunidad pa reuni durante di e dos conferencianan tambe cu representantenan di e destinacionnan cu ta importante pa continua desaroya e aspecto aki.
Aruba a ricibi elogio como un di e bon partnernan di e companianan di barco crucero. Como destinacion responsabel, a destaca e habilidad di Aruba pa establece, maneha y mantene protocolnan esencial cu ta importante pa e isla mes, y tambe ta alinea cu esunnan di e lineanan di crucero. Esaki ta posibel pa medio di e colaboracion estrecho entre Aruba Tourism Authority, Aruba Ports Authority, Directie Volksgezondheid, Directie Scheepvaart, e crisis team y otro entidadnan gubernamental y no-gubernamental.
Un otro factor cu a destaca ta e grado halto di vacunacion na Aruba; esaki a yuda enormemente pa captura oportunidadnan pa nos isla.
Ora cu e prome barconan a cuminsa nabega bek den Caribe den zomer 2021, Aruba tabata tin e honor di ta parti di e prome itinerario den nos region. E lineanan di crucero a expresa hopi aprecio pa e cooperacion cu nos isla a brinda y con a traha di cerca cu nan pa hunga un papel importante den e proceso pa nan por cuminsa ofrece nan producto y servicionan bek na nan clientenan.
Un punto cu ta hopi importante pa menciona, segun e companianan di crucero, ta cu nan pasaheronan ta expresando un grado di satisfaccion significantemente mas halto compara cu evaluacionnan di prome cu e pandemia, asina confirmando cu e pasahero ta sinti su mes sigur y ta disfruta mas di su biahe.
Sigur un bon señal cu ta masha positivo tambe pa cada destinacion ta e indicacion cu e cantidad averahe di placa cu e pasaheronan ta gasta riba e barco crucero durante di nan biahe a subi substancialmente. Esaki ta indica cu e pasaheronan tin e capacidad economico y tambe ta mas dispuesto pa gasta mas durante di nan biahe di crucero.
Un otro topico discuti durante di e conferencianan ta cu e inversionnan den e industria no a para y ta sigui cu e produccion di barconan nobo, entre otro. Tambe companianan a anuncia cu nan ta sigui expande nan flotanan cu barconan di “generacionnan nobo” manera e Oasis y XL Class y tambe barconan cu ta inclui tecnologianan moderno cu ta reduci e impacto riba medio ambiente. Esaki ta inclui cu lo tin mas barco cu ta uza LNG (liquefied natural gas) como combustibel.
Aruba Tourism Authority ta satisfecho cu e resultadonan di e conferencianan aki y e resultado di e strategianan pa cu e industria di crucero, y lo continua traha di cerca cu e socionan local y internacional pa sigui desaroya e industria di turismo di crucero den un forma positivo.
###