Home Police Un dama adicto a saca cuchiu pa un otro na e conocido...

Un dama adicto a saca cuchiu pa un otro na e conocido cas di droga na Shiribana

SHARE

Shiribana:
Diadomingo den oranan di merdia, un muher adicto a saca cuchiu pa e conocido Roland De Mey, kende ta donjo di e cas na Shiribana. E dama lo a haya problema cu De Mey y a bira agresivo, e dama lo a saca cuchiu pa De Mey.Esaki no lo a cay den bon tera y De Mey lo a bati alarma

Presencia di polis a wordo pidi na e cas y aki polis a papia cu e dama adicto y cu De Mey. De Mey a pidi pa e dama adicto bay for di su cas. E dama a bay piki su cosnan y despues cu polis a papia basta cu ne, e la dicidi di bay for di e cas.

E adres aki ta e conocido cas na Shiribana y ta un secreto publico den bario cu aki ta caminda adictonan ta bay, pa un cos cu ta droga. Tin algun di e adictonan ambulante cu ta keda drumi eynan y mas cu claro nan lo tin cu paga huur tambe. Hopi biaha e adictonan no tin placa pa paga y e donjo ta saca nan afo.

Algun siman pasa, un cantidad di adicto, mayoria conoci di polis a wordo saca pafo di e cas pa motibo cu nan no ta of no kier paga huur.

E drugspand manera e tipo di casnan aki ta wordo yama, ta cas caminda adictonan ambulante of adictonan na Aruba cu auto y trabou ta frequenta pa droga. Akinan mas sigur nan lo ta haya droga y por usa esaki den e cas mes.

Segun bisinjanan na varios ocasion nan a yega di mira muchanan hoben drenta den e drugspand aki, mas sigur nan ta bay eynan pa busca droga, te hasta muchanan cu uniform di scol sa drenta den e cas aki. Varios damita hoben cu poco poco ta bayendo den e mundo cruel di adicion ta bay eynan pa busca droga. Kiko tur cu nan ta pasa aden of nan lo mester haci eynan pa haya e droga no ta conoci, pero un cos ta sigur, e mundo di adicion ta un mundo hopi baho y cruel, den cual rapemento, maltrato y prostitucion ta algo masha comun den e mundo di adicion.

Un par di luna pasa por a mira un dama hoben cu un baby den brasa a drenta den e cas aki y despues di basta rato e la sali bay. Kiko tur por a pasa cu e dama y su baby ta algo cu un hende cu no ta den e mundo di adicion no por ni imagina.

Tambe na e cas aki tin un forma di drive thru, auto ta para un adicto ta sali hiba algo na e auto y dje e auto ta sigui.

E ta un tristeza di mira cuanto hende ta frecuenta e cas aki, cu un solo motibo cu ta pa droga. Actualmente autoridad ta haciendo varios entrada hudicial relaciona cu casonan di droga, na diferente drugspanden.
NO ta conoci si e adres aki tambe un dia lo wordo bishita pa autoridad, mirando cuanto di e casnan aki tin na Aruba, caminda adictonan ta bay pa haya y usa droga.