Home Local FPNA a participa den curso regional pa conservacion di mangel

FPNA a participa den curso regional pa conservacion di mangel

SHARE

ORANJESTAD, ARUBA – Recientemente, Ranger Anthony Koolman y Research & Conservation Manager Giancarlo Nunes di Fundacion Parke Nacional Aruba (FPNA) a haci un bishita di trabou na Boneiro pa participa den un curso regional organisa pa Mangrove Maniacs, STINAPA, Dutch Caribbean Nature Alliance (DCNA) y e Regional Activity Center pa e Specially Protected Areas and Wildlife (CAR-SPAW).

Na 2020, FPNA a bira e organisacion apunta pa meneho di conservacion di diferente areanan natural nobo na Aruba, esakinan ta inlcui entre otro areanan di mangel. Sigun Sr Nunes “FPNA ya caba a cuminsa cu planta matanan den Parke Nacional Arikok y pronto lo cuminsa traha riba restauracion di e areanan di mangel tambe. Pa nos por haci esaki adecuadamente, nos mester siña mas hopi posibel di nos coleganan cu tin decadanan di experiencia”.

Sr Nunes a sigui splica “E curso intensivo di dos siman aki tabata bale la pena. Durante un serie di presentacion, nos a siña hopi di e diferente islanan di Caribe con nan ta implementando proyecto di restauracion di mangel, cu ta inclui drecha e calidad di awa, coba canal pa mehora e circulacion di awa, y colecta sushi mastanto posibel mirando cu hopi biaha ta tira sushi den mangelnan. Nos a siña tambe cu nos coleganan tin mes un retonan cu nos tin na Aruba di polucion, bestianan cu ta come e mata (e.o. burico y cabrito), sedimento cu ta keda pega na e wortelnan door di agricultura no sostenibel, desaroyo y construccion den e rooinan, tur ta impacta e ecosistema di e mangelnan den un manera negativo”.

Sr Koolman y Nunes tambe a haci diferente bishita di trabou, nan a bai na Lac na e area cu tin mangel preto cu a coba canalnan pa mehora e circulacion y e calidad di awa. Den algun aña, e area aki a transforma di un area cu mangelnan tabata muri pa un area di mangel abundante yena cu bida caminda cu parhanan y bestianan acuatico a regresa. Tambe nan a bishita e parti di mangel cora caminda cu door di e sedimento di erosion cu ta keda pega mester a coba canalnan nobo pa asina awa por pasa pa e mangelnan no muri. E participantenan di e curso a pasa algun ora ta corta e mangelnan pa haya e practica con pa mantene e circulacion di awa, tambe nan a planta fofoti den e areanan mas halto y seco.

Sr Koolman tabata impresiona cu e resultadonan positivo di añanan di dedicacion di un grupo grandi di boluntario. Sr Koolman a regresa Aruba cu gana di traspasa e informacion pa su coleganan y cuminsa traha riba proteccion y restauracion di nos flora. “E tabata un hopi bon experencia pa mi por a siña for di profesional y expertonan di e otro islanan. Awo mi ta hopi mas entusiasma pa restaura Aruba su palo di matanan native y tambe nos mangelnan pa e beneficio di naturalesa y Aruba su hendenan”.

E islanan ABC a wordo hopi afecta pa tur e siglonan cu a cap palo di matanan, rosa terenonan, y bestianan cu ta cana rond y ta come tur e flora. E bishita di trabou na Echo Boneiro y e projecto di Tera Barra Nature Park tabata un realisacion di efecto cu awor ta purba restaura. E proyecto di planta mata aki a wordo sera deliberadamente cu un cura pa asina por mantene e cabrito nan pafo, sino tur e matanan lo wordo comi. Burico y cabritonan no ta bestia native di e islanan ABC pero a wordo introduci den e siglonan pasa y tin estudionan haci entre e islanan riba impacto grandi di esakinan riba e flora nativo. E dos proyectonan aki ta cultiva palo di matanan nativo pa asina plantanan den tera. Den 10 aña a transforma un area seco cu solamente algun cadushi pa un area yena cu mata y palonan nativo door di activamente restaura e area y tambe den e forma natural caminda parhanan ta sprei e simianan. Proyectonan di planta mata ta contribui na conservacion di e biodiversidad nativo , cu ta yuda drecha e tera y combati cambio di clima door cu matanan ta absorba e carbon y otro gasnan for di aire, y yuda cu baha e temperatura door di duna sombra, asina aki haci nos islanan mas habitable den futuro.