Home Corte 22 y 16 aña di prison exigi pa grupo complice di asesinato...

22 y 16 aña di prison exigi pa grupo complice di asesinato cruel di Lisander Ignacio

SHARE

ORANJESTAD – Awe mainta Corte di Husticia tabata bou vigilancia special relaciona cu tratamento di e caso di asesinato cruel di Lisander Ignacio.

Aruba Native por a compronde cu Fiscal ta haya e sospechosonan Wuill Vrolijk (21), Joshua Wouters (25), Yael Frans (30) y Brandon Wouters (22), culpable di riba 15 Januari 2021 a tira mata Lisander Ignacio (Sami) (21).

Brandon Wouters a presenta den rolstoel. Esaki ta debi cu na Juni 2019 el a wordo tira door di un miembro di e gang di Pos Chiquito. E bala a perfora un pulmon y a afecta su weso di lomba.

E cuater sospechosonan a wordo treci Corte bou escolta pisa mientras cu den sala di Corte tabatin un batayon di tanto miembronan di CEA como e unidad special di KIA y Polis.

Hues a cuminsa trata e caso contra e rumannan Yoshua y Brandon promer y despues a trata e caso di Vrolijk y Frans. Despues a laga tur sinta hunto pa scucha e demanda di daño y exigencia di Fiscal.

Mama di Sami y e mama di e yiu di Sami, A.L., a haci demanda di daño. E mama di Sami a bisa cu e no a spera cu e muchanan ta bay haci algo asina cu su yiu. El a demanda 5 mil florin pa daño haci na su auto y 8640 florin pa gasto di entiero. El a exigi daño inmaterial di 6 mil florin pa e dolor cu el a sinti di a perde su yiu y ta hayando tratamento di psycologo. E mama di e yiu di Sami, A.L. a exigi ayudo pa cria e yiu di 5 aña. El a bisa Hues cu e mucha cada vez ta puntra pa su tata y ta yora. El a bisa cu e ta traha pero no ta suficiente.

Fiscal a bisa cu ta un caso hopi tristo. Un hoben (21) a wordo mata 15 Januari 2021 na forma cruel. E caso aki a conmove henter comunidad. Sami tabata sinta den su auto dilanti cas y a wordo tira den cabez y a fayece. Patologo a constata 2 tiro den cabez y e tironan a wordo haci hopi serca di e cabez. Polis a haya 3 huls na banda di auto. Investigacion a mustra cu ta un pistool 9 mm Winchester a usa pa mata Sami. Investigacion a mustra cu esun cu a tira tabata para na e porta di chofer.

Fiscal a bisa cu for di compilacion di imagennan di video di seguridad di casnan den vecindario, a bin haya un bista kendenan tabata envolvi. Promer a reconoce Vrolijk como esun mas largo. Tambe a mira e auto y despues di investigacion a bin haya sa cu e auto ta di Vrolijk. E tabata e promer sospechoso cu a wordo deteni. A base di declaracion di Vrolijk a bay over na detene Frans. Vrolijk a bisa cu el a bay hiba Yoshua Wouters Pos Chiquito pa e wak su chick y Brandon Wouters tambe tabata den auto. Tanto Vrolijk como Frans ta bisa cu ta Yoshua ta esun cu a tira Sami mata.

Pa cu e castigo, Fiscal a bisa cu e ta tene cuenta cu ni cuanto castigo exigi, no ta trece Sami bek y no lo kita e sufrimento cu e mama y famia ta pasando.

Fiscal ta haya tur culpable di asesinato sanger friu. El a bisa cu apesar cu nan ta complice lo tin diferencia den castigo pasobra e ta haya cu tin diferencia den funcion.

Na opinion di Fiscsal, si Brandon no a insisti, cu mester tuma venganza contra e gang di Pos Chiquito pa a tira riba dje, e asesinato cruel aki no a tuma lugar.

El a exigi pa Brandon y Yoshua, 22 aña di prison. Pa Frans y Vrolijk Fiscal a exigi 16 aña di prison.