Diahuebs 4 di November, a tuma luga un reunion entre gobierno y sindicatonan na JFK Education Center. Gobierno di Aruba a invita e sindicatonan pa comparti informacion tocante e situacion financiero di pais Aruba. Señora JoAnn Kock di Directie Financien a duna un presentacion di e situacion financiero di nos pais enfatisando cu pa prome biaha den su historia, Aruba a pasa den un crisis cu un resultado asina devastador pa nos pais. Despues di e presentacion di señora Kock, señor Edwin Jacobs di SVB a duna un presentacion di e situacion di nos gastonan di cuido di salud. Durante e presentacionnan, a atende tambe cu e puntonan di agenda cu sindicatonan a propone y despues Gobierno a atende cu e puntonan di sindicatonan. Pa parti di Gobierno, tawata presente Prome Minister Evelyn Wever-Croes, Minister Ursell Arends, Minister Xiomara Maduro, Minister Dangui Oduber, Minister Rocco Tjon, Minister Geoffrey Wever y Minister Endy Croes.
Den su introduccion pa duna apertura na e reunion, Prome Minister a refiri na e impacto cu Covid tawata tin riba nos pais. Aruba ta un di e paisnan mas fuertemente afecta den nos region, segun e prome analisis di IMF. Gobierno a actua hopi lihe y ta danki na decisionnan y accionnan rapido di Gobierno, por a duna sosten financiero na esnan cu na e momento ey a perde trabou of tabata core e riesgo di perde trabou.
Prome Minister a indica cu pa gran parti, esaki tabata posibel danki na e sosten di likides cu Aruba a ricibi di Hulanda desde April aña pasa, cu te cu awe ta suma na 904 miyon florin. Loke ta e loonsubsidie y e sosten financiero na midden en klein bedrijf, a cubri di e sosten di likides aki.
Banda di esaki, Gobierno a bin cu un Proyecto pa yuda esnan cu a perde trabou debi na e pandemia, FASE, cu por a cubri danki na e aporte di solidaridad di empleadonan di sector publico y semi publico, “pa cual nos ta hopi hopi agradecido”, Prome Minister a accentua.
Pa e kwartaal aki tin un necesidad di likides di 85 miyon, y aki Gobierno ta diferencia di opinion cu CAFT. CAFT ta di opinion cu Aruba no mester di e placa e kwartaal aki. Gobierno ta na mesa ainda cu Hulanda pa por yega na acuerdo riba e sosten di likides pa e kwartaal aki y e ultimo palabra no a cay ainda.
Hulanda / Caft ta poniendo algun condicion adicional pa cu esaki:
- E 60 miyon cu mester corta den cuido, esaki ta algo cu Hulanda a impone riba Aruba, sin consulta cu Gobierno. “Ni cuanto nos a pidi nan pa demostra nos di unda nos por haya e placa, nan no a duna ningun indicacion”, Prome Minister a duna di conoce.
Gobierno ta calcula cu por yega 37 miyon e aña aki. Pa loke ta gasto di cuido di salud, si nos no tuma paso awor, e fondo ta bay kibra. Gobierno ta trahando riba un plan di accion y prome cu tuma decision definitivo Gobierno kier scucha opinion di sindicatonan den esaki.
- Mester baha gasto di personal y ta enfoca riba reduci overtime y haci algo pa stop e periodieke verhogingen. Prome Minister a expresa: “Si nos ta sincero cu nos mes, nos mester admiti cu ambos categoria di gasto, gasto di cuido y gasto di personal, mester baha, si nos kier trece nos finansas publico den balance den futuro. Y pa por logre den futuro nos mester cuminsa awe”.
Na final di e reunion, Prome Minister Evelyn Wever-Croes a gradici tur sindicato pa nan presencia expresando: “Aruba mester di nos tur y p’esey mi a invita boso pa yuda nos pensa con pa tuma e miho decisionnan den bienestar di henter nos pais”.
