Home » Minister Rocco Tjon: UN VISION PA CRIANSA A NIVEL PEDAGOGICO DI NOS MUCHANAN; HACI CONOCI CU ARUBA SU COMISION PEDAGOGICO “OPVOED COMISSIE”

Minister Rocco Tjon: UN VISION PA CRIANSA A NIVEL PEDAGOGICO DI NOS MUCHANAN; HACI CONOCI CU ARUBA SU COMISION PEDAGOGICO “OPVOED COMISSIE”

by Admin
0 comment 59 views

 

ORANJESTAD – Diaranson mainta Minister di Husticia y Asuntonan Social Sr. Rocco Tjon hunto cu expertonan den e area social a reuni cu e ekipo cu ta forma parti di “Comision Pedagogico”, cual ta un colaboracion entre varios departamento di gobierno y fundacionnan importante den e mundo pedagogico, manera entre otro; Departamento di Asuntonan Social, Fundacion pa nos Muchanan, Wit Gele Kruis, Fundacion Respeta mi y Tienda di Educacion. E diferente instancianan a firma un acuerdo (MOU) pa conhuntamente traha riba varios nivel, unda ta traha pa mehora colaboracion entre departamentonan social y e fundacionnan local.

E comision pedagogico a nace for di e Interlandelijke Taskforce Kinderrechten cu ta activo desde aña 2016, di cual Aruba, Hulanda y e demas islanan Hulandes ta forma parti di dje, cu tin como meta prinicipal pa salvaguardia e derecho di nos muchanan, caminda por medio di cooperacion entre e paisnan di Reino y demas isla por comparti informacion y “best practices” cu otro. Pa Aruba sra Yvonne Bermudez ta embahadora di temanan cu tin di haber cu crianza y lanta mucha, y sra Sacha Geerman ta forma parti como miebro fiho pa Aruba den e Taskforce.

Despues di e conferencianan y consultanan riba nivel di reino e Interlandelijke Taskforce Kinderrechten Aruba a stipula 6 metanan di enfoke:

  1. Stimula prevencion y crianza positive
  2. Garantiza crianza sano y evita abuso di mucha
  3. Desaroya rednan di proteccion
  4. Stimula participacion di muchanan y hobenan
  5. Guia professional na hoben y famia
  6. Atencion special pa muchanan vulnerabel 

Despues cu e Interlandelijke Taskforce Kinderrechten a institui e Comision Pedagogico Nacional a cuminsa traha riba un miho colaboracion, cu a resulta den un acuerdo (MOU) pa mehora e relacion y cooperacion entre e diferente instancianan, pa asina tambe conhuntamente traha riba metanan cu nan tin den comun. E MOU aki a percura pa tin un acuerdo di compromiso entre e partneran, pa asina comparti informacion cu otro, duna conseho unda mester, stimula cooperacion entre nan pa por ehempel den caso di proyectonan y campañanan por yuda otro pa yega nan metanan comun. Algun aspecto cu lo haya atencion adicional ta e desaroyo di “Safety Nets” pa nos muchanan, caminda lo percura pa actividadnan despues di scol, pa por sigui stimula e desaroyo social como tambe brinda atencion adicional na e muchanan cu ta cay den e categoria di mas vulnerabel.

Ademas, por medio di e canal aki, por monitor e desaroyo di e derechonan di mucha den nos region, como tambe intercambia experticio y conseho cu por aporta den e cumplimento di e meta principal. Actualmente pa e luna di November, e comision pedagogico ta preparando varios evento alrededor di e “Opvoed Week” cu lo tuma lugar di 18 di November pa 2 di December, y lo tin como dia central e “Dia Internacional di Derechonan di Mucha” cual ta dia 20 di November.

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio