Home Local Conservacion di Shoco: Solucion basa riba naturalesa haci den colaboracion

Conservacion di Shoco: Solucion basa riba naturalesa haci den colaboracion

SHARE

 

ORANJESTAD, ARUBA – Shoco (Athene cunicularia arubensis) ta un di e simbolonan nacional di Aruba, e ta un especie endemico protegi pa ley cu ta existi solamente na Aruba y ta den peliger di extincion. Tin diferente factornan cu ta forma un menasa pa e populacion di Shoco, un di esakinan ta e perdida di habitat natural door di urbanisacion cu ta crea e conflicto entre conservacion di naturalesa y crecemento socio-economico. Perdida di habitat natural di Shoco tin como consecuencia cu e populacion ta baha y ta yega na peliger di extincion. 

 

Sigun analisis, pa nos por papia di un populacion di Shoco saludabel y sostenibel aki na Aruba, nos tin mester di alrededor di 300 par di Shoco cu ta reproduci. Pa motibo di scarcedad di cuminda y limite di espacio door di tera duro di e areanan di conservacion, ta bira dificil pa tin un populacion di 300 par di Shoco cu ta saludabel y sostenibel den e areanan aki, cual ta hacie nesecario pa integra e bida natural den e bida urbano cu tur su consecuencianan. Shoconan ta traha neishi primordialmente den areanan habri cu tera moli pa asina nan por coba nan neishi, esaki sa pasa riba terenonan den construccion y cu mayoria biaha ta wordo destrui despues. Naturalmente e ta faborabel pa evita, of minimalisa e impacto y of introduci accion di conservacion ora Shoconan traha neishi den areanan urbano of di construccion. 

 

Creando neishi urbano artificial 

 

Alededor di cinco aña pasa Fundacion Parke Nacional Aruba (FPNA), Aruba Birdlife Conservation (ABC) y The Global Owl Project a bini hunto pa diseña un proyecto di conservacion di Shoco. Cu añanan y cu exito acumula e proyecto a transforma den un Programa Nacional pa Conservacion di Shoco y ta basa riba consientisacion, minimalisa menasanan riba habitat y crea habitat nobo door di introduci neishi artificial. Di e manera aki e partnernan di conservacion FPNA y ABC a instala mas di 70 neishi artificial rond di Aruba, pa por yega na un populacion di Shoco saludabel y sostenibel ta premira cu lo mester instala rond di 500 neishi artificial. 

 

Instalacion di neishi artificial ta un accion di conservacion cu ta tuma lugar den areanan urbano y di desaroyo, inclui sitio di construccion, mayoria biaha e ta un manera pa mitiga impacto. Pa prome biaha na Aruba, e partnernan di conservacion a wordo aserca proactivamente pa un desaroyador di e proyecto residencial Bona Vista Hills pa for di inicio inclui accion di conservacion di Shoco den e planificacion di e proyecto pa conserva Shoconan riba e tereno. Esaki sigur ta un inciativa pa aplaudi caminda cu contratistanan hunto cu e partnernan di conservacion a yega na un colaboracion pa inclui solucion basa riba naturalesa den e proyecto residencial. 

 

E team di FPNA a haci diferente analisis pa determina cuanto neishi di Shoco tin den e area pa asina crea un Proyecto di Compensacion di Habitat di Shoco na e proyecto residencial aki.  Un total di dos neishi a wordo identifica riba e tereno, caminda cu un neishi tabata tin un par di Shoco cu tabata bibando aden y un otro neishi cu ta duna indicacion cu tabata tin Shoco a biba aden den e ultimo añanan. Den e Proyecto di Comensacion di Habitat di Shoco a instala cinco neishi artificial di Shoco den e retonde na final di cada caya. Esaki ta haci e prome proyecto residencial cu a inlcui solucionan basa riba naturalesa den e diseño aki na Aruba, no ta un sorpresa cu recientemente e proyecto a atrae e atencion di Minister Arends di Transporte, Integridad, Naturalesa y Asuntonan di Adulto Mayor cu a bishita e proyecto pa presencia esaki pa su mes. 

 

Abo tambe por yuda!

E partnernan di conservacion FPNA y ABC pa algun aña caba ta conserva y monitor e populacion di Shoco. Aunke ta keda encurasha pa protecion di habitat natural di Shoco embes di compensacion, e partnernan di conservacion ta intermedia como e ultimo solucion caminda cu ley, maneho y sistema di persmiso nacional ta faya pa proteha e Shoco. Pa e Shoco por sobrevivi den e area urbano ta importante pa nos minimalisa nos impacto riba dje. E impacto ta entre otro ora di maneha auto pa ta consciente di Shoco rond di bo pa asina evita dal nan. Mantene pushi y cacho leu di neishi di Shoco pa asina no coba esakinan y mata e babynan. Ora di off-road no uza e neishi como un rampa pa bula riba dje, esaki lo spanta e Shoconan y duna nan stress y nan lo bandona e neishinan. Ta conciente riba e uzo di insecticida. Shoco ta come raton, cacalaca y tor, uzando insecticida ta haci cu e Shoco por muri indirectamente door di come un di e bestia of insectonan cu a wordo mata cu veneno. 

 

Si bo mira un Shoco cu ta den peliger please tuma contacto cu Fundacion Parke Nacional Aruba of cu Aruba Birdlife Conservation pa asistencia.