Home Corte Caso penal contra empleado cu a horta mas cu 61 mil florin...

Caso penal contra empleado cu a horta mas cu 61 mil florin na Censo

SHARE

ORANJESTAD – Awe mainta Corte di Husticia a trata e caso penal cu Ministerio Publico a cuminsa contra e homber L.

Aruba Native por a compronde cu L. entre 2018 y 2019 a horta mas cu 61 mil florin for di Censo, unda e tabata traha. E tabata bay gamble e placa cu a horta den casino.

E acusacion cu Fiscal a presenta contra L. ta cu durante 1 April 2018 y Januari 2019, el a malversa placa na Censo.

Ta asina cu L. a admiti den Corte y a bisa Hues cu el a haci’e door di necesidad di placa pa paga su debenan. El a bisa cu ora cu na 1 April 2018 e hefe di control no tabata bin mas, el a tuma e chens. L. a bisa Hues cu su pensamento tabata pone placa bek. E tabata usa e placanan cu e tabata coy for di Censo pa gamble den casino pero no a gana placa. Te na 2019 a bin otro persona cu a controla y a constata cu L. a malversa mas cu 61 mil florin.

Segun L. ora el a wordo gara, el a bay un psycologo. Ta asina cu L. a wordo kita September 2019 for di Censo. Su debenan tabata para pendiente e caso aki. Hues a bisa cu Censo awor tambe ta demanda pa L. paga bek. Abogado mr. Emerencia a puntra si L. ta kere cu e ta adicto na gamble. El a bisa cu si. El a bisa di ta dispuesto pa haya guia riba esaki.

Censo a demanda 61,615 florin. E representante di Censo a bisa cu nan a keda den shock cu esaki. L. tabata un hopi bon empleado. El a abusa di a confianza cu a pone den dje. Por a nota cu L. a cuminsa yora.

Fiscal a bisa Hues cu e ta spera cu L. realisa cu su adiccion na gamble a perhudike. E ta haya cu L. mester di tratamento pa su adiccion. Na opinion di Fiscal, mester manda señal bon cla cu esaki no por. Si ta horta placa di Gobierno, tin castigo pisa.

Fiscal a exigi 6 luna di prison condicional cu 3 aña di prueba. Banda di esey, Fiscal a exigi 200 ora di trabou pa comunidad pa L. Pa loke ta e demanda di Censo, Fiscal ta haya cu por aproba 50 mil florin segun ley. El a exigi pa pone e medida di pago of 1 aña di prison. El a bisa cu e resto di e mas cu 61 mil florin, Censo lo por demanda den un caso Civil.

Hues, despues di a scucha e defensa di abogado, a sera tratamento di e caso y dia 25 November 2021 lo tin sentencia.