ORANJESTAD – Recientemente Minister di Cultura a reuni cu sr. Chibi van der Hans kende a presenta su investigacion y compilacion di informacion di e Carnaval di Aruba. Sr. van der Hans ta trahando riba un buki cual ta contene entre otro informacion di e origen di carnaval, di eleccion di reina y di prins cu pancho, eventonan musical y musica di carnaval, gruponan di carnaval y hopi mas detaye di Aruba su Carnaval.
Sr. Chibi van der Hans a publica 23 edicion di e revista Bachanal desde cu ela lanse na 1998 y a hiba esaki den un Plataforma digital online na 2018. Asina mes e tin como 90% di su documentacion fotografico cu nunca a wordo publica. Cu Carnaval 50 a nace e idea pa bin cu un documentacion den forma di un buki cu ta conta e storia di carnaval di Aruba desde su inicio, contando por medio di fotografia den un prome edicion e storia di carnaval na Aruba y tur eventonan rond di dje desde 2004 te cu 2009. Cu cada 5 aña di carnaval lo bin un edicion nobo.
Riba conseho di Universidad di Aruba, Sr. Chibi van der Hans a hiba e buki den un direccion academico, haciendo asina varios investigacion pa colecta y constata datonan di carnaval di Aruba corespondiente cu cada potret. Pa esaki a haci varios entrevista pero tambe a acudi na Biblioteca Nacional di Aruba pa compila e informacionnan valioso pa e buki su contenido.
Sr. van der Hans a duna un splicacion amplio di e layout di e buki, contando asina varios storia valioso cu ta defini nos historia carnavalesco y cu ta forma parti di nos herencia cultural. E buki ta den su fase final.
Minister Xiomara Maduro ta gradici sr. van der Hans pa e trabou importante aki pa e memoria colectivo di nos Pais. Un bunita proyecto den cual ta documenta y conserva e historia di Carnaval di Aruba.
