ORANJESTAD – Den luna di augustus Departamento di Salud Publico a firma un Memorandum of Understanding (MOU) cu e compania OK2Roam. E compania di OK2Roam tin un plataforma digital cu lo realisa e tarea di verifica e PCR test di e pasaheronan a traves di nan laboratorionan rond mundo cu ta acredita. E programa aki lo ta un programa piloto cu lo wordo lansa den luna di november y lo tin un duracion di 12 luna.
E unico cos cu e biaheronan mester haci ta scohe un di e laboratorionan cu ta aproba pa Gobierno di Aruba pa tuma un PCR test. E red grandi internacional di e laboratorionan aki ta wordo proporciona pa VFS Global. E Sistema aki lo funciona similar cu e Common Pass cu ta wordo uza pa biaheronan di e aeroliña di Jet Blue y e por ta un otro opcion pa nan tambe.
Unabes e biaheronan bay di acuerdo pa haci uzo di OK2Roam, nan informacion di entre otro nan PCR test y nan vacuna lo wordo procesa riba OK2Roam riba su plataforma digital. Despues cu e biaheronan haya nan resultado di laboratorio, nan lo ricibi un codico cu lo mester wordo yena den e plataforma di ED card online.
E desaroyo aki lo bay facilita henter e proceso di entrada na Aruba pa e pasaheronan. E pasaheronan ya no mester warda mas pa nan resultado di e PCR test wordo acepta y e upload di e certificado di e test ta keda pa pasado.
Minister di Turismo y Salubridad Sr. Dangui Oduber a expresa cu e idea ta uno hopi bon y simpel y cu Aruba ta encanta pa ta e pioneronan hunto cu OK2ROAM y VFS Global. E minister a sigui bisa cu esaki lo yuda Aruba duna su bishitantenan un mihor experencia na nan yegada na nos isla den aeropuerto. Danki na e presencia mundial di VFS Global, Aruba lo bay atrae mas bishitantenan cu ta biaha di partinan leu. E biaheronan aki generalmente lo keda pa un period mas largo y ta gasta mas, asina Minister Oduber a expresa.