Home Politics PROME MINISTER TAWATA PRESENTE NA E LANSAMENTO DI E BUKI BUCHI PENCHI...

PROME MINISTER TAWATA PRESENTE NA E LANSAMENTO DI E BUKI BUCHI PENCHI MALO DI TANCHI ESME

SHARE

En conexion cu Siman di Festival di Buki pa mucha na islanan ABC, Prome Minister a duna inicio na su siman di trabou bishitando Colegio Ora Ubao pa e lansamento di e buki Buchi Penchi Malo. Prome Minister a wordo compaña pa Minister di Finansa y Cultura, señora Xiomara Maduro y Minister di Enseñansa y Deporte señor Endy Croes.

 

E autor di e buki Buchi Penchi Malo ta señora Esmeralda Tromp, conoci tambe pa nos muchanan como Tanchi Esme. Tanchi Esme pa mas cu 25 aña tin su mes programa di radio na Aruba cu yama Mundo Infantil, entreteniendo nos consentinan di cas cu un variacion unico den su programa. 

Editorial di Buchi Penchi Malo, Request Publishing ta relata cu Buchi Penchi Malo ta un fabula cu ta trata importancia di evita di pensa y haci maldat, e importancia di scoge pa pone meta pa logra algu den bida. E storia tin varios siñansa. Entre otro e importancia di solo pa humanidad, e aspecto di pordona, mustra afeccion y disidi pa scoge e bon caminda. 

Prome Minister den un discurso cortico na e ocacion a felicita Tanchi Esme cu e lansamento di su buki Buchi Penchi Malo. “Un buki hopi bunita cu ta envolve nos muchanan, pasobra ora bo ta skirbi un buki pa mucha, bo lo kier pa envolve muchanan. Pabien Tanchi Esme cu e bunita buki aki”.

Prome Minister a gradici Colegio Ora Ubao pa e bunita presentacion y pa stimula muchanan pa lesa buki. Prome Minister a corda tempo cu el a bishita Colegio Ora Ubao den eerste klas y a expresa e placer di ta presente na e scol pa e presentacion bunita aki.

Un di su gustonan grandi tempo e tawata mucha, Premier di Aruba a duna di conoce ta lesa buki. El a expresa cu lesamento di buki ta hiba e lesado na luganan cu e lo no bay normalmente y ta pasa den aventuranan sumamente bunita. Esaki sigur ta algo cu nos mester traspasa pa nos muchanan. 

Prome Minister a laga un mensahe atras pa tur mayor, tanta, omo, wela y welo: “Ban traspasa e balor di lesamento pa nos muchanan. Di e manera aki nos ta yuda nan pa confia y expande nan horizonte. E tema di e siman aki ta bisa “Ta loke bo kier ta”. Cada mucha por bira loke e kier bira. Esaki ta un mensahe sumamente poderoso pa nos siña cada mucha di nos pais. Loke nan pone nan mente y nan curason na dje, nan por logra”.