En conexion cu di 29 edicion di Festival di Buki pa mucha
ORANJESTAD: Aruba ta cla pa cuminsa cu Les-A-Thon 2021 cu ta cuminsa dia 1 di november te cu 30 di november. Un total di 30 dia di lesamento. Les -A- Thon ta un iniciativa di Stichting Kids Creation Center, Scol Amplio, Nos Cosecha, Biblioteca Nacional Aruba y Asociacion Trabou Di Hubentud Na Aruba (ATHA).
Pa medio di Les-A-Thon, muchanan den seno familiar por gosa di un aventura cu lesamento cada dia. Lesamento ta esencial pa crea un generacion cu ta siña pa bida. Lesa buki ta duna oportunidad pa un mucha encontra su mes y ta brinde un sin fin di oportunidad pa explora. Crea amor pa lesamento, conecta cu famia y celebra apertura di siman di buki. Comunidad di Aruba, mayornan y educadornan ban sigui enfoka riba derecho di cada mucha. E aña aki cu ta enfoka riba tratado number 17; mucha tin derecho di ricibi informacion for di diferente fuente manera entre otro; buki.
Tema di UNICEF pa Dia Internacional Di Derecho di Mucha 2021 ta enfatisa riba e derecho cu e mucha tin pa un desaroyo continuo. Como Minister di Enseñansa & Deporte nos ta sostene y apoya iniciativanan manera Les-A-Thon cu ta duna atencion na eseñansa y educacion di cada mucha. Exito, animo y gosa di cada aventura di lesamento.