ORANJESTAD – E homber P. a presenta dilanti Hues di Corte di Husticia pa e caso penal cu Ministerio Publico a cuminsa contra dje. Aruba Native por a compronde cu P., kende tin 15 aña cu su pareha O., y nan tin 3 yiu, ta wordo acusa di a viola su pareha dia 14 April 2021.
Hues a cuminsa cu e denuncia di e dama O. riba 14 April 2021. El a bisa cu e tin 3 yiu cu P. y 4 luna promer el a kibra relacion. Dia 14 April 2021 e tabatin un cita cu notario atardi. Door di Covid e mester warda pafor relacion cu distancia social. Parando pafor P. a bay riba dje. Segun O., P. a gar’e na su braza y bis’e pa bay cun’e sino lo tin problema. O. a dicidi di bay cu P. y den auto, P. a puntra O. ki c… el a bay haci na notario. E tabata blo puntra O. pa su cellular. P., coriendo auto, tabata dal O. cu mokete na pia pa laga e tas los pa asina e por coy e cellular. Na dado momento P. a bisa cu awor O. ta bay h.. y a hib’e den vecindario di Sero Cristal. El a coy e cellular y tabata puntra O. pa code pa habri e cellular. Na dado momento P. a ordena O. pa habri su pia pa e controla si O. no tabatin relacion cu un otro homber. Despues di a controla, el a bisa cu awor e ta bay tin relacion sexual cu O. P. a ordena O. pa kita su carson sino lo maltrat’e. O. na yoramento a laga P. viol’e. P. despues di a tene relacion sexual cu O., a puntr’e kico lo bay pasa awor. O. a declara na Polis cu el a gaña P. cu e lo bay bek cun’e. Asina ey P. a hib’e bek na notario y a warda O. subi su auto y sigui su tras pa bay cas di O. su ruman muher. Na e cas, O. a sera porta pa P. E ruman muher di O., a constata cu O. tabata maltrata y a sali pafor cu un palo di golf pa P. E ora P. a bay y nan a yama Polis. A hiba O. na un clinica pa determina con el a wordo maltrata y abusa. A constata manchanan blauw na pia di O. E ruman muher a bisa cu el a mira su ruman muher O. su cara tur cora y O. a cont’e kico tur P. a haci.
Ta asina cu den Corte, P. a desmenti di a viola O. El a admiti di a dal O. pero a bisa cu e no a forza O. pa tin relacion sexual y cu O. no a resisti.
Ademas di e lamentable caso di violacion, tin dos caso di maltrato di O. Uno tabata 5 Januari 2019 na cas di mama di O., caminda P. a kibra un bentana, drenta den e cas y maltrata O. dilanti O. su mama.
E otro caso tabata 22 di Januari 2019 caminda e biaha aki ta na cas di mama di P., ora cu O. a bay busca su yiunan, P. a maltrat’e.
Abogado mr. Croes di O. a demanda 5 mil florin di daño material.
Fiscal a bisa Hues cu e ta haya legalmente proba cu P. a viola e dama O. cu violencia riba 14 April 2021. Na opinion di Fiscal, P. mes ta admiti di a dal O. na cabez y pia. Tambe P. a bisa cu nan tabatin relacion sexual.
Fiscal ta haya cu e suma di 5 mil florin, pa un dama cu a wordo viola ta acceptable.
Fiscal a exigi 3 aña y 6 luna di prison di cual 10 luna ta condicional cu un tempo di prueba di 2 aña. Fiscal tambe a exigi pa prohibi P. di tin contacto cu e dama O. Hues, despues di a scucha abogado, a bisa cu e ta bay studia e caso y dentro di algun siman por spera sentencia.