Home Local A promove Chris Lake como director general di ASTEC

A promove Chris Lake como director general di ASTEC

SHARE

ORANJESTAD – 31 di october 2021- Despues cu e conocido Raymond Buckley a fungi como director temporario na ASTEC, siman pasa e Hunta di Supervision a anuncia cu a yam’e danki pa su trabou, di maneha y revisa e organisacion formalmente y cu awor ta cla pa nombra un director nobo. Cu masha orguyo a anuncia cu a promove Christopher Lake for di ‘financial controller’ pa director general di e compania.

Lake a gradua na Universidad di Aruba cu un “bachelor’s degree” den ‘accounting and finance’ y a cuminsa traha na ASTEC desde aña 2011 como ‘financial analyst’. Durante e añanan cu a sigui, el a haya mas responsabilidad, manera por ehempel como supervisor y despues manager di e departamentonan “Administration, Human Resources & Information Technology” y a cuminsa administra e fondo di pensioen di empleadonan desde 2014. Desde 7 aña pasa e ta fungi tambe como director adhunto di e compania y ta asumi responsabilidad na momento cu e director ta ausente.

Chris Lake no a keda cu su mannan crusa tampoco y a opta pa sigui studia mientras cu e ta traha. Asina el a logra su “post bachelor’s in controlling curriculum” aña pasa for di Nyenrode Business University den cooperacion cu Universidad di Aruba.

Separa di ta un trahado dedica, Chris Lake ta masha activo den comunidad y ta kere firmemente den duna bek. Asina e ta e Tesorero di Fundacion Parlamento Hubenil y ta Hoofd Commissaris di Asociacion Scouting Aruba.

ASTEC N.V. ta existi desde September 1983 y ta conta cu no menos di 80 empleado bon entrena pa ofrece e miho servicio posibel na tur barco di carga cu mara na nos waf. Anualmente ta descarga entre 300 pa 400 barco di carga. ASTEC N.V. ta partner cu Aruba Ports Authority (APA NV) den construccion, financiamento, operacion y mantencion di e terminal nobo di waf di carga situa na Barcadera.

#####