Home Corte Asesinato cruel na Brazil trata den Corte

Asesinato cruel na Brazil trata den Corte

SHARE

ORANJESTAD – Awe mainta Corte di Husticia a trata e caso di asesinato cruel cu Ministerio Publico a cuminsa contra e homber Pascual Brown (22).

Aruba Native por a compronde cu riba 12 di April 2021, Pascual Brown a tira mata su amigo Richi Henao Tavarez.

Huez a bisa cu segun e raport di Polis, dia 12 April 2021 anochi a pidi asistencia na un cas na Brazil caminda un hende a sufri tiro den cabez. Polis a yega na e cas y haya Richi sinta den patio pero no ta duna señal di bida. Hues a bisa cu autopsia ta mustra cu door di tiro den cabez, Richi a fayece. A haya e bala den su cabez. Investigacion a mustra cu e bala ta di un revolver Cal. 38.

Den Corte a pasa imagennan di e camera di seguridad di bisiña caminda por a mira con Pascual ta yega na e cas den un Nissan March. E ta para banda di e cura y ta sali gebuk for di e auto cu un arma den man. El a bay den direccion di e cas y a tira. Despues ta mir’e ta core bay den auto.

Recherche a bay investiga via facebook di Richi y mira potret di Pascual como friends y asina ta detene. E pareha di Richi, e dama L. a bisa cu nan tabata sinta den patio di cas. Na dado momento el a tende un sonido duro y a kere cu ta un klapchi. El a bira cara na banda drechi y mira un persona ta canando bay na un auto. El a bira pa wak Richi pa puntr’e si el a mira loke el a mira y a constata cu Richi a wordo tira den cabez.

Hues a mustra cu Pascual a declara na Polis cu di chikito e cu Richi a lanta na Brazil. Na cierto momento e dama L y Richi a drenta relacion. Na dado momento Richi a cuminsa bende droga y usa cocaina. Pascual no ta di acuerdo y el a bisa Richi pa stop. Segun Pascual, door di e usamento di droga, e relacion Richi y L. no tabata bon. Segun Pascual el a intermedia y papia cu Richi pa drecha su bida. Na cierto momento Pascual a haya menaza di Richi riba facebook. Segun Pascual el a compronde e mensahe cu Richi ta acuse di lo ta papia cosnan secreto di nan relacion y lo bay regla cune. Dia 12 April 2021, Pascual a bay na lighthouse pa medita cu e auto Nissan March di su mama y na dado momento el a sinti algo malo. El a sali pa bay cas di Richi pa resolve e problema. Na caminda e ta mira auto di un Venezolano cu e conoce y a pidi un arma. E Venezolano a facilit’e un revolver Caliber 38 y a bis’e cu e ta costa 1000 dollar.

Pascual a bay di acuerdo pa paga despues. El a bay cu e arma aki na cas di Richi y na dado momento el a mira Richi y L. Segun Pascual, e y L. tabata mira otro y e ora ey el a perde cabez y tira Richi. Segun Pascual, ta culpa di L. cu a bay cont’e con Richi tabata trat’e. E cosnan ey a keda traha riba dje.

Hues a mustra cu desde 2018, Pascual ta hayando tratamento na Respaldo. E tabata hopi depresivo y pensamentonan paranoid. Hasta pensamento di mata curpa. E tabata pensa malo ora hende keda wak e. Psychiater ta haya cu Pascual tin problema mental paranoid y esey a causa cu el a tira mata. Na opinion di psychiater, Pascual no ta responsabel pa su actonan. Psychiater ta recomenda pa Pascual haya tratamento pa e keda den realidad y no paranoid. Hues a pospone e caso pa 11 November 2021 caminda lo bay evalua e raport adicional di psychiater.