Home » Siña pa bida  Un reflexion cortico di mi 45 aña den enseñanza 

Siña pa bida  Un reflexion cortico di mi 45 aña den enseñanza 

by Admin
0 comment 72 views

 

Pa e version completo bishita mi website olgajbuckley.com of mail mi na: [email protected] 

Introduccion 

Na 1968 un grupo di 25 hoben entusiasma a cuminsa cu nan estudio pa maestro, e tempo ey ainda na Colegio Arubano. Educacion secundario na Colegio Arubano tabata consisti di HBS A, B y C, HBS-C tabata prepara e studianten pa ingresa den e estudio pa maestro. 

Varios di nos a sigui profesionalisa den enseñanza, den pedagogia y diferente otro materia, y a aporta na un forma mas amplio riba e diferente nivel- y terenonan di enseñanza y educacion, tambe na APA/IPA. Tin cu a drenta IPA bek como docente, te hasta como director. Ami a forma parti di e grupo aki. Den e ensayo aki mi kier comparti mi experiencia y observacionnan den e 50 añanan aki. 

Na aña 1968 Arubaanse Pedagogische Akademie (APA) a haya su propio director den persona di Bram Dercksen (1968-1971), un persona cu tabata mas cu director, un tata pa su studiantenan y tabata considera APA su cas. 

Su vision di e cas aki tabata un espacio, no solamente fisico, unda ta forma persona capacita pa educa un comunidad cu e hermentnan responsabilidad, empatia, pasion y amor pa e mucha como ser humano. Como instituto para riba su mes pia, APA tabata merece un localidad propio. Mr. Dercksen banda di e tarea nobo y pisa di director a hacie su mision pa e localidad bira un realidad mas pronto posibel. 

Na september 1969 APA por a drenta den su propio localidad den edificio ‘Mansur’, e edificio dilanti di Elmar, cu a bira despues Piedra Plat Enterprices. Tin cu bisa si cu ta te na 1989, 20 aña despues, e estudio pa maestro a haya un base legal como estudio HBO. 

Lamentablemente e prome edificio na unda APA/IPA tabata ubica a kima na april 2014. 

Ainda despues di 50 aña Mr. Dercksen su herencia pedagogico, den cierto sentido, ta core den vena di enseñanza na Aruba. 

E responsabilidad pa bira un maestro cu ta pone e mucha central ta cerca e persona cu scoge e profesion aki. E mester percura pa scol ta un luga sigur, cu ta inspira e mucha confiansa. E mester ta e mucha su confidente. Binnen zonder kloppen, refiriendo na e hecho cu no tin niun tarea mas importante cu e mucha cu bati na bo porta. Si bo scoge pa e profesion di maestro no cay den e custumber di draai bo les y basta. Renoba bo material di trabou, no warda metodo nobo. Variacion ta mantene atencion bibo. No bira esclavo di metodo. 

Lamentablemente Mr. Dercksen no por a traha largo na su mision; di otro banda tin cu bisa cu afortunadamente e team di docente cu a traha bou di Mr. Dercksen a keda bon ekipa pa sigui desaroya su vision di un Academia pa formacion di maestro. Na april 1971 e famia di APA a haya un sla duro, cu e fayecimento inespera di Mr. Dercksen, net un luna prome cu e examen final di e prome grupo aki. 

Di e 50 añanan mi a traha 45 aña activamente na scol na Aruba y 2 na Hulanda. Un trayectoria basta largo,nos por bisa. Mi a traha masha cortico den enseñanza regular aki na Aruba. Hende ta keda straña

ora mi bisa, cu si mi por a nace di nobo, lo mi a bolbe scoge e profesion aki, specificamente den Enseñanza Special, anto den un grupo. 

Mi motivacion principal ta cu den e profesion aki bo por haci diferencia grandi na formacion di un ser humano y a lo largo di un comunidad, si di berdad bo tin e pasion pa forma hende. 

Banda di esey, y sigur no menos importante, e hecho cu den Enseñanza Special e mucha ta haya les na Papiamento, su lenga materno, loke ta dun’e mas confiansa den su habilidadnan. Otro aspecto importante den e trabou na Scol Special ta e espacio cu tin pa duna atencion na e alumno individual y e ‘responsabilidad ’di bishita cada alumno na cas por lo menos dos biaha pa aña y combersa cu mayor y voogd. E bishitanan aki ta masha importante pa fiha e acercamento cu ta aplica pa cada mucha individual. 

Mi a cuminsa mi carera como maestra na Macuarima School. For di un principio tabata preocupa mi cu for di asina jong, di anochi pa mainta, cu un vocabulario incompleto y sin ta domina e conceptonan necesario ainda, e mucha tabata hay’e confronta cu Hulandes, un idioma straño p’e den tur sentido.  

Apesar cu ya caba enseñanza tabata obligatorio for di 5 aña no tur mucha tabata bishita scol preparatorio, sigur no regularmente. Despues di dos aña mi a bay traha na Kibrahacha School, e scol pa Enseñanza Special na Piedra Plat. Si Hulandes tabata un reto pa e mucha di scol basico regular, imagina bo pa e mucha di Scol Special. E metodo pa idioma di e tempo ey ‘De Taaltuin’, absolutamente no tabata un ‘tuin ’pa e muchanan, mas bien un castigo. Hunto cu colega nos a desaroya y comparti material y a cuminsa scondi duna les na Papiamento. 

Kere mi, mundo a habri pa e alumnonan, nan por a participa mas activamente y tabata comprende e lesnan mas lihe. Pa evita problema mi a mustra e muchanan potret di e Inspector di Enseñanza, Sr. Ernesto Rozenstand (dfm), pa nan ta alerto pa ora nan mir’e riba tereno di scol, nan warda tur material na Papiamento, saca esun na Hulandes y bira e borchi cu e les di ‘De Taaltuin’. Esey a bay bon, nunca mi no a haya bishita di inspector. 

Mi no ta bisa cu ta facil, ta berdad cu ta depende di diferente factor, condicion y recurso, cu nunca lo ta suficiente. No tabata 50 aña pasa, no ta awor y no lo ta den futuro. 

Danki Dios cu no. Perfeccion por stroba creatividad y hinca ser humano den un korset, cu di pafo por mustra nechi, pero di paden por hog’e, stroba desaroyo y kita atencion y concentracion for di e meta. Den caso di enseñanza; desaroyo, formacion, proteccion y siguridad di e mucha como ser humano. 

Mi ta consciente si di e realidad cu nos ta biba aden den e di tres milenio aki. Esun cu ta exigi mas y mas y mas. Mas avanse economico financiero, mas ora di trabou, tecnologia mas avansa, mas materialismo, mas competencia, mas exigencia, mas prestacion, mas individualismo, e lista por ta hopi mas largo. 

Durante e 50 añanan mi a pasa den diferente fase di evolucion den enseñanza. Mi a traha den tempo cu scol tabata caba 3.15 di atardi, cu excepcion di diaranson cu merdia tabata liber. Mi a mira hopi desaroyo y progreso, mi a mira metodo bin, metodo bay. Mi a participa na un sin fin di tayer relaciona cu enseñanza y educacion. Mi a experiencia modernisacion tanto di contenido, como organisatorio y infrastructural, cu no tur ora tabata na beneficio di enseñanza. 

Mi a mira hopi di mi coleganan bay di educador, pa bira dunado di cuido, psicologo, trahado social, verpleegster, mama, tata, polis, defensor di mucha. Mi a traha tambe cu colega cu bou di presion di nan mesun situacion personal tabata canalisa esaki riba e alumno ‘mal cria/mal mucha’. Cu pa mi bon mira no ta existi, si bo tuma e dos ‘labelnan ’literalmente. Cu tin mucha cu cierto problema di comportacion ta un hecho. Ta un echo tambe cu e manera di acerca nan por haci diferencia den nan

comportacion. (Decreto riba derecho di mucha Unicef art. 28: E mucha tin derecho riba enseñanza. Ta prohibi pa grita of dal un mucha) 

Mi a mira hopi colega drenta cu entusiasmo integra den team, sinti nan mes na cas y pone nan schouder banda di esunnan cu tabata sostene e mucha y fortifica e trabou. 

Mi a experiencia con e union aki ta haci hopi reto manehabel y ta habri porta pa solucion. 

Mi a mira colega recien gradua drenta cura di scol entusiasma cu nan caha carga di herment nobo, cla pa comparti y traha na bienestar di e mucha, wordo laga un banda of hasta pon’e sinti no mucho bon bini, cu no a keda nan otro escogencia cu pone tur herment bek den caha y purba otro caminda. 

Mi a traha cu colega cu tabata por wak e mucha den su cara para scuch’e, lag’e duna su opinion, dun’e alternativa di pensa y ta critico. (Decreto riba derecho di mucha UNICEF art. 12: E mucha tin derecho di duna su opinion y di wordo scucha) 

Mi a traha den ambiente unda reto tabata inspira creatividad cu tabata duna e mucha juist e espacio pa explora y siña di experiencia, fula, mishi, hole, faya y bolbe purba. 

Mi a traha tambe den ambiente unda e mucha ta haya un copia di un pintura djis pa kleur, figura corta cu glitter caba riba dje y lijm su tras, pa e mucha djis plak. Tur material na midi, tur tema na midi, tur scogencia haci caba. (Unicef decreto riba derecho di mucha articulo 29: Mucha mester por desaroya su 

talento, si ta trata di pinta, idioma, deporte of arte. Mucha mester wordo prepara pa un mundo den cua e ta liber pa expresa su mes) 

Mi a traha den ambiente unda pauze tabata pa e mucha hunga y relaha su mente y curpa. Mi a traha tambe den ambiente unda pauze tabata instrumento pa coregi comportacion no desea, door di priva e mucha di hunga. (Decreto riba derecho di mucha UNICEF articulo 31: E mucha tin derecho di hunga y riba tempo liber y trankilidad) 

Pa finalisa mi ta contento di comparti cu bo cu e 45 añanan aki a duna mi hopi goso y satisfaccion. 

Enseñanza na Aruba tin hopi reto, esaki ta un realidad. 

Mi kier curasha tur educador; sigui cu e bon trabou, tene e pasion bibo, no perde curashi y sigui purba cu e recursonan cu tin. 

Apesar di reto grandi, no perde e mucha for di bista. E tin mester di bo. 

Olga Buckley. 

Oktober 2021

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio