Home » Prome Minister Evelyn Wever-Croes: EMPLEADONAN PUBLICO A RICIBI CERTIFICACION DI CURSO PA TRAHA DEN MANEHO ENFOCANDO RIBA IMPLEMENTACION DI SDGS

Prome Minister Evelyn Wever-Croes: EMPLEADONAN PUBLICO A RICIBI CERTIFICACION DI CURSO PA TRAHA DEN MANEHO ENFOCANDO RIBA IMPLEMENTACION DI SDGS

by Admin
0 comment 94 views

ORANJESTAD – Prome Minister señora Evelyn Wever-Croes y Minister Geoffrey Wever tabata presente na e clausura di e seminario pa empleadonan publico “Capacity Building for the Implementation of SDGs”. Un curso organisa door di Gobierno di Aruba specificamente pa empleadonan publico, pa prepara nan pa traha den maneho, teniendo cuenta cu e metanan di desaroyo sostenibel / “Sustainable Development Goals (SDGs).

Na e ocasion Premier Wever-Croes a haci uzo di e momento pa felicita cada un empleado publico cu a termina e curso y ricibi nan certificado. E curso tabatin un duracion di seis luna y a conta cu participacion di 77 empleado publico. 

 

Gabinete Wever-Croes II ta sigui cu e compromiso di metanan di desaroyo sostenibel y ta kere profundamente cu solucionnan innovador y sostenibel lo tin un impacto positivo enorme, riba e bienestar di cada ciudadano. 

 

Den cuadro di SDGs, Aruba a bin ta progresa estableciendo diferente comision y plan entre otro: “National SGD Commission”, tambe e “Masterplan Repositioning our Sails” y e “National Strategic Plan based on the SDGs”. Ademas Aruba ta incorpora e SDGs den diferente plan, presupuesto y tin grupo cu ta enfoca riba campaña di conscientisacion, Prome Minister a splica. 

 

E tarea cu tin awor ta pa percura logra cu e acercamento aki no keda den Gobierno solamente pero henter sociedad. Bisando esaki, Prome Minister a accentua cu e trahado publico ta e persona cu ta mas cerca di e ciudadano Arubano considerando cu e trabou ta directamento conecta cu esnan cu ta haci uzo di servicio publico. Pa cual ta sumamente contento cu tur cu a haci uzo di e oportunidad pa siña algo nobo y cu ta hacie posibel pa nan por desaroya manehonan basa riba evidencia, implementa esakinan, monitor y evalua e manehonan aki pa por crea miho bida pa e ciudadanonan. 

 

Premier Wever-Croes a splica cu aña pasa no tabata solamente un “wake up call” pa con vulnerabel Aruba ta, pero ta kere firmemente cu e experiencia aki a provee Aruba cu oportunidadnan nobo. Oportunidadnan cu no por desperdicia pa percura cu ta cumpli cu e SDGs.

 

“Pa esaki sosode nos mester ta comprometi na brinda servicio publico a traves di miho maneho y cu ta garantisa inclusion. Tambe contribucion, pa midi e impacto y planifica adelanta con pa alcansa e SDG pa 2030. Por ultimo e mentalidad di colaboracion tambe ta necesario pa percura pa tin colaboracion entre departamentonan pa inclui sector priva, NGO’s y henter comunidad”.

 

Segun cu e implementacion di SDGs ta avansa den e decada di tuma accion, otro aña Aruba lo presenta su rapport di progreso di implementacion di SDG, na Nacionnan Uni. E proceso di evaluacion nacional ta un oportunidad pa enforsa dialogonan den sociedad, encurasha colaboracionnan y crea mas innovacion pa percura pa ta actualisa cu e SDGs, Prome Minister a splica. 

 

“Mi tin gran aprecio pa e hecho cu durante di pandemia  asina tanto persona a tuma e decision pa participa y kier extende palabra di danki na e directornan di departamenonan cu a reconoce e balor agrega di participacion di nan staff den e cursonan. Ta gradici tambe e comision di SDGs pa identifica e necesidad pa tin un curso pa capacidad pa yuda crea miho entendimento di conceptonan importante di desaroyo sostenibel”. 

 

Por ultimo Prome Minister a gradici e instituto ‘Icon Institute’ pa asumi e tarea pa desaroya e material pa e curso, provee e training y pa Universidad di Aruba pa firma e Memorandum of Understanding (MoU). E mescla unico aki di conocemento y expertcio trahando den colaboracion ta haci e curso mas sostenibel.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio