Home » Minister Rocco Tjon: REUNION FRUCTIFERO CU PROCUREUR GENERAL DI MINISTERIO PUBLICO; A TOCA DIFERENTE PUNTONAN DEN CUADRO DI MINISTERIO DI HUSTICIA

Minister Rocco Tjon: REUNION FRUCTIFERO CU PROCUREUR GENERAL DI MINISTERIO PUBLICO; A TOCA DIFERENTE PUNTONAN DEN CUADRO DI MINISTERIO DI HUSTICIA

by Admin
0 comment 40 views

 

No lo corta den e “wenselijkheid begroting” di instancianan cu ta enfoka nan mes den combati corupcion, por ehempel Ministerio Publico y Landsrecherche.

 

ORANJESTAD – Dialuna merdia Minister di Husticia y Asuntonan Social Sr. Tjon a reuni cu Procureur General di Ministerio Publico Sr. Bote Ter Steege, caminda a toca varios puntonan cu ta pertenece na Ministerio di Husticia, entre otro e maneho sostenibel pa loke ta combati corupcion na Aruba, e cuido forensico pa loke ta trata KIA y por ultimo regulacionnan den cuadro di abuso sexual.

 

For di Ministerio di Husticia y Asuntonan Social a vocifera na diferente ocasion cu no lo corta den e “wenselijkheid begroting” di instancianan cu ta enfoka nan mes den combati corupcion, por ehempel Ministerio Publico y Landsrecherche. Segun Minister Tjon, actualmente tin un concepto riba mesa. Aki ta trata di un plan di maneho caminda tur instancianan concerni a duna comentario riba dje cu e meta final pa yega na un unidad dedica na combati corupcion.  E unidad aki lo wordo instala serca Ministerio Publico bou di autoridad di Ministerio Publico di Aruba y lo bay tin su propio fiscal como tambe su propio ekipo huridico, pa asina por tin un unidad dedica unicamente na e tema aki. 

 

Siguientemente, a reuni tambe tocante e cuido forensico y con esaki lo mester wordo incorpora na Aruba of den nos region pa asina por garantisa un miho cuido na un persona durante y despues di a sinta su castigo. Den cuadro di esaki tambe a toca e topico di KIA, caminda un di e visionnan ta pa percura pa yega na un instituto cu por brinda un bon cuido na hobennan como tambe esnan cu tin mester di e cuido forensico. E meta di esaki ta pa zorg di por baha recidivismo pa asina percura cu resocialisacion y reintegracion por ta un exito. 

 

Por ultimo a toca e topico di abuso sexual, caminda dentro di poco lo bay tin regulacionnan nobo pa loke ta e problematica di abuso sexual na Aruba. Den cuadro di esaki “beleidsvoornemens” nan di Ministerio lo inverti den e departamentonan pa asina por pone mas enfoke riba e parti di prevencion pero tambe riba e parti di  investigacionnan cu ta wordo haci, pa esakinan por ta uno mas solido. Lo haci inversionnan necesario e aña aki mes, caminda lo provee cursonan pero tambe lo inverti den e materialnan necesario pa esaki. 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio