Dialuna 25 di oktober 2021 Parlamento lo trata e ultimo concepto di e ley di integridad pa candidatonan pa nominacion como ministro. E importancia di dicho ley no ta ser cuestiona pero ta peor pasa un ley cu ta simplemente crea e ilusion di legitimidad cu no pasa nada. E concepto di ley actual tin varios fayo y den nos opinion esun mas grandi ta cu e ta nenga di acepta nos realidad politico. Si e pasa den su forma actual e lo simplemente formalisa e proceso defectuoso cu ta existi actualmente. E conflicto di interes mas grandi ta cu formador ta un candidato pa nominacion como ministro. No solamente e tin un interes pa gobierno forma pa por bira ministro pero tambe e no ta den un posicion obhetivo pa nenga demandanan di un candidato di ken e mester sosten pa e gobierno por forma.
Nos di ACCION 21 lo propone un amienda cu nos ta spera lo conta cu sosten di tur fraccion pa sanea e deficiencianan den e concepto di ley actual. E prome cambio ta hancra den ley cu formador mester ta un persona apolitico cu no ta un candidato pa ministro. E di dos cambio ta cu nos amienda ta establece un nivel minimo di HBO pa ser nomina ministro. E dos cambionan aki ta elimina e conflicto di interes existente y garantisa cu e mihor candidato(nan) di e partido(nan) formando gobierno lo ser elegi como ministro.
Mirando cu na 1999 Director di VDA a tuma su retiro paso formador no a tuma na cuenta su aviso negativo y gobernador no a para e nominacion ta importante pa Parlamento haya un rol den e proceso. Nos amienda ta crea un Comicion Fiho di Parlamento pa screening di candidato(nan) pa nominacion como ministro. Dicho comicion lo consisti di tur lider di fraccion y lo ser encabesa pa e lider di e partido mas grandi di oposicion asina fortificando mas un sistema di checks and balances. Si lider di e partido mas grandi di oposicion ta automaticamente Voorzitter di e Comicion Parlamentario pa screening pueblo tin un garantia mas cu e comicion no lo wordo tuma rehen door di p.e. controla cuanto biaha e ta reuni y kiko e puntonan di agenda lo ta. Asina nos lo por garantisa no solamente un rol activo pa Parlamento pero tambe cu e resultadonan di screening lo pasa un proceso di revision robusto.
E existencia di un Comicion Parlamentario tambe lo habri caminda pa un candidato por apela pa excepcion si acaso e tin mester di eherce actividadnan auxiliar pa mantene su licencia. Den e concepto di ley actual, siguiendo e recomendacion di Raad van Advies, e excepcion pa cierto profesionalnan a wordo elimina. Nos ta kere cu esaki ta contraproductivo y inhusto paso no ta ser spera cu ningun persona lo sirbi como minister te edad di pensioen. Mirando cu tin mas persona hoben den política incluyendo doctor y psicologo ta importante pa nan por mantene nan licencia pa despues por bolbe na nan carera despues di nan retiro fe politica.
Nos amienda tambe ta tuma na cuenta cu por existi relacionnan manera esun di un candidato pa nominacion como ministro y un amante cu tambe por crea un conflicto di interes no desea cu e concepto di ley actual no ta atende. E cambionan cu nos ta propone ta duna formador e posibilidad di investiga lasonan cu personanan relaciona cu no ta necesariamente famia segun definicion di e concepto di ley, asina mehorando e resultado di screen un candidato pa ministro. Tambe nos ta reconoce cu dinamicanan di famia por ta complica y den e caso caminda un candidato tin un familiar bibando den exterior cu no ta den cuadro di leynan local, e mester por apela na e Comicion Parlamentario pa un excepcion si dicho familiar no ta cooperativo den haci e declaracionnan necesario pa su nominacion ta exitoso.
E cambionan na e concepto di ley lo fortifica y modernisa e procesonan bao cual un candidato ta ser nomina y despues nombra como ministro si dicho candidatura ta exitoso. Mas cu esey e ta crea un rol importante pa Parlamento cu no solamente ta garantisa un tercer pilar di legitimidad pero tambe provee candidatonan cu un mecanismo di apelacion asina salvaguardiando un proceso husto di tur banda. Nos ta spera cu nos coleganan di Parlamento sostene e cambionan positivo den e amienda cu lo garantisa un mihor gobierno y asina un mihor pais pa futuro generacionnan di Arubano.