Home Local Den e caso grandi di droga pa Merca, no tin niun persona...

Den e caso grandi di droga pa Merca, no tin niun persona di fam Croes of famia di Prome Minister deteni

SHARE

Oranjestad, Aruba:
Dialuna Prome Minister di Aruba, Sra. Evelyn Wever Croes a reaciona riba rumornan cu lo tabata core riba Whatsapp, rumoranan cu a cuminsa circula despues di e entradanan Hudicial na tres cas den area di Santa Cruz.

Segun e rumornan Minister President di Aruba lo tin un relacion estrecho cu un supuesto cartel di droga na Aruba, cu lo ta wordo guia pa su famianan. Prome Minister Wever Croes a nenga esaki categoricamente, ni su persona y ni su famia tin un relacion cu un cartel di droga of cualke otro cartel. Prome Minister ta para ariba, cu cada persona ta responsabel pa nan actonan. Esun cu comete algo equiboca mester sinta riba su blaar.

E la sigui bisa cu lamentabelmente mescos cu otro famianan na Aruba, tin comportacion menos bon tambe den su famia, por ehempel ex Minister di AVP Paul Croes, cu ta un primo. Prome Minister Evelyn Wever Croes, enfaticamente a bisa cu e sigur no tin nada di haber cu esaki y cu si tabata tin detencion di un miembro di su famianan, ta algo cu su persona no ta na altura di dje.

Segun Senjora Wever Croes; ” esaki ta prueba cu e sistema hudicial ta funciona y cu e Gobierno actual si ta duna Ministerio Publico tur e espacio pa nan por actua independientemente y esaki ta haci nos estado di derecho mas fuerte.”

Minister President Evelyn Wever Croes a conseha tur esnan cu ta interesa pa sa si su persona tin un famia encarcela, pa tuma contacto cu Ministerio Publico, pasobra su persona no sa nada di e caso aki. Senjora Evelyn Wever Croes ta para pa integridad, e la mustra esey durante su carera politico di 12 anja y sigur durante e ultimo 4 anja como Prome Minister di pais Aruba.

Prome Minister Wever Croes a pone e fundeshi pa un Aruba Integro. Dialuna durante dia den Parlamento lo trata un ley di integridad.
Evelyn Wever Croes ta para pa integridad y ta para fuertemente contra corupcion. E rumornan aki ta sali for di su oponentenan politico, pero su persona ta laga e rumornan pa loke nan ta. Prome Minister a sigui bisa pa tur hende kere den loke cu nan ta weita y su actonan ta mustra hopi mas di locual, su oponentenan politico kier pa pueblo kere.

Segun Ministerio Publico den e caso di droga den cual siman pasa a haci entradanan Hudicial na tres diferente adres, nos a wordo informa cu no tin niun persona di fam Croes deteni. E unico persona cu nan a detene durante e entradanan Hudicial aki, ta un persona di fam Thiel. E persona di fam Thiel, di niun banda no ta famia di famia di Evelyn Wever Croes.

E unico famia di Prome Minister cu actualmente ta den noticia ta ex Minister di AVP, Sr. Paul Croes, e la wordo haya culpabel, enberdad e ta famia di Evelyn Wever Croes, pero no por culpa Prome Minister di e actonan di corupcion cu un primo a comete, es mas Paul Croes tin un ideologia politico cu ta completamente diferente na esun di Prome Minister Evelyn Wever Croes. Tambe cada ken ta responsabel pa nan actonan y Paul Croes so ta responsabel pa su malcomportacion y no henter su famia.