Bogota, Colombia
Na Colombia un di e Kingpin nan di droga mas busca a cay.
Aki ta trata di e Kingpin Dairo Antonio Usuga alias ‘Otoniel’. E Kingpin Otoniel di 50 aña ta encabesa e clan di droga yama Clan del Golfo . E banda di droga aki ta consisiti di mas di 1200 miembro y tur ta hende arma.
Autoridad Colombiano tabata tin mas cu 7 aña ta buscando pa pone man riba Otoniel. Gobierno di Colombia a pone un recompensa di 3 biyon Peso Colombiano pa e tip di oro. Autoridad Americano a pone riba dje 5 miyon dollar di rencompensa pa informacion y unda e ta bibando.
Presidente Ivan Duque di Colombia a yama e detencion aki e sla di mas duro di e siglo aki, cu e baho mundo di traficacion di droga Colombiano por a ricibi. E la compara e detencion di Otoniel, cu e caida di Pablo Escobar den añanan 90.
E accion grandi aki a haya e nomber di Osiris, E operacion yama Osiris aki tabata tin como 500 agente policial y otro agentenan di teamnan special envolvi. Otoniel a wordo deteni den e regio di Uraba, na e provincia di Antioquia. E la wordo getrace y deteni akinan. Den e accion aki un polis a perde su bida.
E Kingpin ta tras di tralie awo y mas sigur lo sper’e un castigo di prison masha largo mes, e tabata wordo acusa di un lista largo di crimennan. Entre otro likidacion di varios persona, entre otro di agentenan policial, tambe e ta wordo acusa pa trafica cocaina pa Estados Unidos, di labamento di placa ricibi di organisacionnan criminal, di recluta menornan di edad y di abuso sexual cu menor.