ORANJESTAD – Recientemente a tuma lugar un caso lamentabel caminda un hoben di nacionalidad Venezolano a perde su bida tragicamente. Minister di Husticia y Asuntonan Social sr. Rocco Tjon ta al tanto di e situacion y ta tumando pasonan necesario pa trata e caso aki.
Minister Rocco Tjon a duna di conoce cu investigacionnan den e caso lamentabel di e hoben di nacionalidad Venezolano ta andando, sinembargo, na e momentonan aki no por divulga ningun informacion pa asina no stroba e proceso hudicial. Locual cu si por bisa ta, cu Ministerio di Husticia y Asuntonan Social ta den contacto cu famia di e fayecido cu ta den exterior y lo facilita e proceso pa por trece e famia Aruba, pa asina nan por ta na Aruba pa por despedi di nan ser keri.
Na mesun momento, Minister Rocco Tjon ta pidi cooperacion di comunidad pa no stroba e proceso hudicial y tambe ta pidi cooperacion di cualkier persona cu por tin informacion valioso y cu por yuda resolve e caso pa porfabor tuma contacto cu e “Tip Line” di KPA na 11141 y lo percura pa esaki keda completamente anonimo.