Santa Lucia;
Diahuebs den oranan di mainta oficina di City Inspector a ricibi un yamada cu lo tin un frigidaire benta canto di caminda y cu tin algun sushedad mas banda di caminda na Santa Lucia.
Mesora City Inspector a pidi polis pa bay Santa Lucia y mira e situacion eybanda. Despues City Inspector a yama Serlimar pa nan por recoge e sushedad aki. Na momento cu Serlimar tabata lantando e sushi, nan a bin topa cu masha hopi sushi benta riba un tereno den e mondi eybanda.
City Inspector sigur ta condena e hecho cu cuidadanonan di Aruba ainda ta benta sushi den mondi. Segun Sr. Rosel di City Inspector lo ta trata di hendenan cu lo ta biba den e area aki. City Inspector ta trata na mantene Aruba limpi, pero ultimamente tur dia nan ta haya yamadanan di sushinan benta den mondi. Siendo cu tin otro forma, sushi por wordo hiba dump si acaso tin un pickup, tambe por huur bakinan di sushi na Serlimar, cu e servicio di entrega di baki te na cas y ta busca e baki cu sushi y hib’e dump.
Tambe den e mondi nan a bin topa no solamente cu un cantidad di sushedad benta den mondi, pero mas den e mondi tin un Mangasina bandona y su tras por mira cu nan ta kima koper. Locual City Inspector no ta compronde cu e habitantenan cu ta biba eybanda no por a haya holo di kimamento di koper y dicon no por a yama City Inspector. Riba e tereno aki nan a bin topa cu dos auto bieu, tambe cu un porco morto. Esakinan sigur no a yega nan so, ta hende a bin tiranan eynan.
Lo dura dos pa tres dia pa e ploeg di Serlimar haci e tereno aki limpi. City Inspector ta haciendo mas investigacion, pa asina haya sa di ken e tereno ta y si ta trata di un huurgrond, erfpacht of eigendom. Tambe City Inspector ta bezig cu D.O.W. pa mira si nan por haya mas liher cu ta posibel, piedra pa cera e entrada cu ta bay na e tereno aki y asina stroba e hendenan di drenta riba e tereno y bolbe benta sushi.
