ORANJESTAD – Awe 2 or di merdia Corte den Promer Instancia a trata e caso di kita propiedad contra Paul Croes, relaciona cu labamento di placa.
Aruba Native por a compronde cu un Hues y un Griffier di Curacao a bin Aruba specialmente pa tratamento di e caso aki.
E Hues di Curacao a mustra cu for di documentonan di tratamento di e casonan den Promer Instancia y e sentencia di Corte Superior por compronde Melony Croes Paesch a wordo declara liber di a laba 209 mil florin. Hof su decision ta cu Paul Croes ta culpable di a laba 183 mil florin.
Fiscal a bisa Hues pa pospone e caso contra Melony pa tempo indifini pendiente e casacion den Corte Supremo. Mr. Illes ta haya cu ta mihor pospone tur e casonan pendiente decision di Corte Supremo, mirando cu Paul Croes a apela e sentencia di Corte Superior.
Hues a bisa cu e ta bay evalua despues di tratamento di e caso si lo pospone of no. Paul Croes a bisa Hues cu a purba di splica Hof di Corte Superior cu no ta asina cu a laba placa. El a splica cu ta masha trabao y bergonsozo pa bay pidi esnan cu a asisti na nan casamento pa bisa cuanto placa a duna na regalo y mester firma. Segun Paul Croes, tur esaki a haci pa demostra cu no ta labamento di placa. Lamentable Hof ta opina otro. Hues a puntra Paul Croes si e tin trabou. Paul Croes a splica cu for di 2018 e no tin salario mas y no tin trabao. Nan ta huur nan cas y Melony tin negoshi pa asina yega na placa pa mantene famia.
Fiscal a bisa cu den un caso di kitamento di propiedad ta basa riba calculacionnan cu a haci den actividadnan criminal. El a bisa cu e hecho cu awor Paul Croes no tin placa, no ta relevante. Paul Croes a wordo condena den Hof pa entre otro labamento di placa. Fiscal a demanda algo mas di 207 mil florin. El a bisa cu si Paul Croes no paga lo tin un castigo di prison maximo di 3 aña.
Abogado mr. Illes a bisa Hues cu e no ta haya cu por haci demanda contra Melony Croes Paesch. Pa loke ta Paul Croes, mester a haci investigacion grandi pa determina cuanto placa a haya ora di casamento. Hof a pone esaki un banda. E abogado a haci apelacion na Hues pa tuma esakinan na cuenta. E abogado a mustra cu Fiscal ta papia di 207 mil mientras cu Hof ta papia di 183 mil florin.
Hues a sera tratamento di e caso y a bisa cu dia 2 December 2021 pa 8.15 di mainta lo dicta sentencia. E ora ey lo haya sa si tin decision of si ta pospone e caso pendiente e sentencia di Corte Supremo na Hulanda.