Home » Minister Arends ta enfatisa e urgencia pa remedia RWZI.

Minister Arends ta enfatisa e urgencia pa remedia RWZI.

by Admin
0 comment 59 views

Dialuna 18 di oktober 2021 durante reuda di prensa na bestuurskantoor minister di Naturalesa, sr. Ursell Arends a elabora riba e urgencia pa remedia RWZI (Rioolwater verzuiverings installatie).

Den comunidad ainda hopi ta puntra kico ta RWZI, su funcion y su balor real pa Aruba. E topico di RWZI ya desde 2018 a wordo escala na nivel di un tema di urgencia. Ta momento pa comunidad realisa cu pa nos por sigui opera e RWZI nos mester un inversion cuantioso y sosten di comunidad henter. Na e momento aki e condicion cu RWZI Bubali ta aden, ta pone nos unico pilar economico – turismo – den peliger.

“Nos mester para keto y realisa cu esaki ta un problema di pueblo di Aruba henter. A bira tempo pa nos reacciona na e problema di RWZI cu seriedad”, Minister Arends ta comenta.
Durante e conferencia di prensa informativo aki, Sr. Frank Benita, Hoofd di Beheer Waterschappen na DOW tambe a elabora riba e seriedad di e tema aki. Aruba ta conoce tres (3) planta di purificacion, pa awa di riool, awa di pos y tambe pa awa di yobida. E facilidad di Bubali ta esun mas bieu, pero tambe esun cu volumen mas grandi di awa ricibi. Actualmente ta ricibi 8000 m3 (kubieke meter) di awa pa dia, pero e ta diseña solamente pa procesa 4500 m3 pa dia. Sr. Benita a nota cu e RWZI Parkietenbos tambe a caba di surpasa su capacidad.

“Den e estado cu e plantanan ta aden, ta forma un peliger na nos salud y nos medio ambiente” – Sr. Arends ta menciona. “A bai di un (1) planta pa tres (3) planta, pero nunca no a percura pa e recursonan necessario pa mantene e plantanan aki funcionabel.”
Durante shutdown di Covid-19 por a ripara cu 65% di e “waste-water” ricibi na Bubali ta bin di turismo. E volumen di awa den e periodo aki a baha te cu 3,000 m3 pa dia y a ripara con e awa cu tabata bai Bubali Plas a aclaria completamente. Desde cu e situacion turistico a bin ta drecha, ta mira cu e estado ta bayendo bek na su situacion di pasado, caminda e bacterianan no ta haya suficiente tempo pa breakdown e sushi den e awa.

Motibo pa presentacion di RWZI tabata pa ilustra e problema di RWZI. Minister Arends ta comenta cu “den e forma cu nos ta trahando horizontal cu otro den gobierno, ta haci mas facil pa nos por colabora entre ministerio pa hunto nos por enfrenta e problemanan aki debidamente”.

Den e periodo binidero gobierno lo percura pa keda cla cu e “business plan”, uzando e experticio tecnico di DOW como su guia, pa por realisa un plan pa financiamento di e proyecto y asina brinda pueblo un solucion duradero y sostenibel. “Di peliger pa solucion. Di awa sushi pa recurso sostenibel” – Sr. Ursell Arends.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio