SANTA CRUZ – Diaranson atardi team grandi di polis, Douane, recherche y ministerio publico despues di un investigacion grandi, aparentemente di simannan largo e team aki, a tene den oranan di atardi, tres entrada hudicial den area di Santa Cruz. Probablemente lo tabata tin mas entrada hudicial otro caminda tambe.
Diaranson atardi nan a drenta un cas na Santa Cruz dilanti santana di Santa Cruz, na Papilon y den e bario nobo banda di Arubaanse Wegenbouw Cochinilla.
Detencion tambe lo a cay, na rotonde di Santa Cruz, autoridad na mesun momento di e entradanan hudicial lo a detene un homber y hopi lihe a bay cune.
Nos a compronde cu diamars den oranan di atardi tambe autoridad lo a detene un persona relaciona cu e caso aki, na airport, na yegada di su buelo.
Segun nos a compronde lo ta trata di un investigacion grandi cu autoridad lo ta haciendo, pa algun siman caba.
Mucho informacion no tin ainda y nos ta en espera di un relato oficial di Ministerio Publico relaciona cu e caso grandi aki.
