Home Politics Minister Rocco Tjon: MINISTER DI HUSTICIA Y ASUNTONAN SOCIAL ROCCO TJON...

Minister Rocco Tjon: MINISTER DI HUSTICIA Y ASUNTONAN SOCIAL ROCCO TJON A UNI SU MES NA E MARCHA DI DIA NACIONAL CONTRA TRAFICACION Y CONTRABANDA DI HENDE

SHARE

ORANJESTADRecientemente a tuma lugar un marcha organisa pa fundacion Coördinatiecentrum Mensenhandel Mensensmokkel Aruba (CMMA)  den cuadro di dia nacional di traficacion y contrabanda di hende.  Hunto cu premier Wever-Croes a dirigi palabra na e comunidad presente.

Desde aña 2007, Aruba a pone e bataya contra traficacion y contrabanda di hende como prioridad den gobernacion. Na aña 2008 Aruba a haya su coordinador nacional riba e topico aki, sigui pa su taskforce na 2009 y su mesun fiscal na 2011. Den aña 2014 e codigo penal a wordo adapta y un unidad investigativo special a wordo forma na 2017, sigui pa e centro di coordinacion den aña 2020 como tambe e unidad pa inteligencia na 2021. Segun e mandatario ‘tur esaki ta muestra di e compromiso di diferente Gobierno pa nos por combati e fenomeno aki.’

 

Cu e campaña “habri bo wowo” un biaha mas atencion a wordo poni riba e dos acto criminal aki como tambe e responsabilidad di henter nos comunidad pa combati esakinan. E mandatario a enfatisa cu ‘nos tur por ta e wowonan cu ta wak, nos tur por ta e oreanan cu ta tende y nos tur por ta e bos cu ta raporta esaki ora algo ta pasando cu otro hende cu ta haya nan mes den e situacion aki.’

 

Minister Tjon a sigui splica cu e fenomeno di traficacion y contrabanda di hende ta uno cu nos tur, pues Aruba completo mester percura pa stop den tur sentido. ‘Den cuadro di esaki nos Ministerio, Ministerio di Husticia, tin un responsabilidad mas grandi ainda, no solamente pa conduci investigacionnan contra organisacionnan criminal cu ta comete e delito aki, pero tambe pa crea mas conscientisacion.’

 

E mandatario a sigui splica cu e campaña aki tambe ta pone un dede riba e comportacion di nos mes como ciudadanonan di Aruba, pasobra hopi biaha nos kier pinta e hendenan di afo como esunnan culpabel di traficacion of contrabanda di hende, mientras cu nos mesun hendenan tambe ta probecha di e mal situacion cu otro hende a haya nan mes aden. Minister Tjon a splica cu e sectornan cu ta mas vulnerabel pa e tipo di delitonan aki ta e sectornan di construccion, prostitucion y trabounan domestico.

 

Minister Tjon a duna di conoce cu como Minister di Husticia y Asuntonan Social, un di e prioridadnan cu su Ministerio tin pa e siguiente añanan ta e asistencia cu nan por brinda e victimanan di traficacion di hende na Aruba. Segun e mandatario, e vision ta pa crea un shelter pero di otro banda ta importante tambe pa brinda otro tipo di asistencia manera asistencia medico, legal, social, y psicologico. 

Por ultimo e mandatario a gradici CMMA, cual ta e lugar central pa informacion, educacion y asistencia den conexion cu traficacion di hende.