ORANJESTAD: Diadomingo atardi Minister di Enseñansa y Deporte Endy Croes tabata presente na Joe Laveist Sport Park na San Nicolas pa aprecia e clinica di futbol cu a wordo organisa pa Soccer Institute Aruba. Un total di 70 hoben entre edad di 6 pa 14 aña di San Nicolas y bisindario a participa diasabra y diadomingo na e clinica di futbol. E clinica tin como meta pa yuda e hobennan desaroya nan habilidad den e deporte di futbol. Durante aña e clinica ta wordo organisa na diferente terno den diferente districto. E fundacion Caribbean Sports Foundation di ex- fubolista Hulandes Robin Nelisse a patrocina entre 8 pa 10 mil florin pa organisa e clinica.
E Mandatario a bisa cu aña pasa como Parlamentario e la presencia e clinica di futbol aki. “Aruba ta un isla chikito, nos kier stimula deporte primordialmente deporte di masa manera; futbol, baseball, softball, basketball, volleyball etc. como tambe deportenan individual pa bini bek pariba di brug” e Mandatardio a expresa.
Minister Endy Croes a sigui bisa; nos lo inverti pa drecha algun infrastructura cu ainda falta atencion. Lo percura pa stimula e sport vereniging mas tanto cu por pariba di brug pa ta hopi mas activo. Den e parti di material nos tin un proyecto pa otorga mas material, paso sin material bo no por practica deporte. Banda di esey nos kier inculca den e scolnan cuminsando for di 4, 5 y 6 klas di scolnan basico na San Nicolas y Aruba henter hopi mas deporte y asina fomenta deporte riba e henter e isla.
Na final di e clinica Minister Endy Croes y Parlamentario Alvin Molina a duna un discurso y a haci entrega di e certificado na e hobennan cu a participa na e clinica.
Por ultimo, Minister Endy Croes a felicita e entrenadonan, boluntarionan, patrocinadonan, e organisado Soccer Institute Aruba y e fundacion di Hulanda Caribbean Sports Foundation. Alabes e Mandatario a gradici e mayornan cu ta apoya nan yuinan y duna nan e sosten pa por practica deporte. Y mas cu claro e mandatario a felicita e atletanan cu ta den formacion cu a haci e clinica un exito rotundo. Mester agrega cu Josephine Albertus a haci un excelente trabou como host y MC pa e programa deportivo aki.
“Deporte ta algo sano y ta fomenta caracter di un hoben. Deporte ta duna disciplina. E dedicacion cu bo tin pa haci deporte, e deseo pa practica e deporte y por ultimo e determinacion cu bo ta lanta cu ne, e ta forma bo pa bira un bon ciudadano pa sirbi bo comunidad. Mi ta sigui stimula e muchanan pa practica deporte. Cada mucha cu a practica deporte lo ta un mucha sano pa e pais aki cu por duna su contribucion bek na henter Aruba.” e Mandatario a expresa.
