Home » Minister Xiomara Maduro durante di “Women Let’s Talk Forum”

Minister Xiomara Maduro durante di “Women Let’s Talk Forum”

by Admin
0 comment 57 views

Kere semper den bo mes y corda cu den tur cos menos bon cu pasa tin algo positivo. Ta nos tin mester di habri nos wowo y nos mente pa mira esey.

Oranjestad – Durante e evento di ‘Women Let’s Talk Forum’ cu a wordo organisa pa Aruba Marriott Resort & Stellaris Casino, Minister Xiomara Maduro a duna un discurso tocante di e tema di salud mental. Un topico cu tabata wordo considera como ‘taboo’, pero den transcurso di ultimo decada, salud mental ta wordo reconoce como un parti esencial di un hende su bienestar y salud en general.

For di aña 1992, Dia di Salud Mental ta wordo celebra dia 10 di october mundialmente. Na september 2015 Nacionan Uni a inclui salud mental como un di e Metanan di Desaroyo Sostenibel. E mandatario a sigui bisa cu salud mental a bira mas popular door di e pandemia COVID19 ya cu esaki tabatin un impacto considerabel riba e salud mental di hende.
Si nos analisa e salud mental di nos poblacion, e resultadonan di Censo Piloto 2020 ta indica cu 9.3% di e salud emocional di nos poblacion ta malo (den un rango di regular te hopi malo). E salud emocional ta deteriora segun e edad ta avansa. Ademas por a observa un relacion significativo entre salud general y salud emocional di e individuonan. Segun cu e salud general di e personanan ta deteriora, e salud mental ta deteriora. Ademas un porcentahe mas halto di hende muhe, un 10.8% ta informa cu nan tin salud emocional malo den comparacion cu hende homber cu ta 7.6%.
Trabao tambe ta mustra di ta hunga un rol den e estado di salud mental di hende homber y muhe. 7.3% di empleadonan a indica cu nan salud emocional tabata malo, compara cu 9.2% di personanan desemplea y 12.4% di esnan inactivo riba nos mercado laboral.

Pa locual ta esnan emplea, e resultadonan ta indica cu den tur tipo di ocupacion, e porcentahe di hende muhe cu salud emocional malo ta mas halto cu e porcentahe di hende homber. Di e hende muhenan cu puesto di liderazgo, 7.9% a indica cu nan salud emocional tabata malo den comparacion cu 6.5% cu hende hombernan den posicion di liderazgo.
Cu e yegada di e pandemia di Covid19 den 2020, tabata bisto cu mundo no tabata ekipa pa enfrenta un crisis di salud mental. Nos a enfrenta retonan cu a causa hopi stress, cu a causa emocionnan fuerte cerca nos tur. E accionnan di salud publico, manera distanciamento social tabata necesario pa reduci e casonan di Covid19, pero a isola nos y laga nos sinti nos so y a aumenta e stress y e ansiedad. Pero nos mester a siña sobrevivi cu e stress na un manera saludabel. Durante di e tempo di distanciamento social tabata hopi importante pa nos keda den contacto cu nos famia y amigonan, yuda otronan pa atende cu e stress atrabes di yamada di telefon of combersacion pa medio di video pa yuda nos mes y otronan pa nos no sinti nos so y isola.

Minister Xiomara Maduro a sigui trece dilanti cu durante e pandemia ela experencia momentonan yen di incertidumbre pasobra Covid a yega na un manera inespera y cu consecuencianan grave. Ela comparti algun experiencia cu a yude pa balansa su salud mental y ta resiliente. Pa menciona algun locual mas a yude ta cu e ta un persona hopi spiritual y tin hopi fe. E fe cu Dios lo yuda nos pasa den e momentonan mas dificil. Ademas e ta mantene un actitud positivo, aunke con dificil e tarea por parce. Apesar di e situacion keda positivo, keda smile. Ora bo encontra cu un reto, bay p’e y focus riba locual abo por controla. Y corda keda semper cu bo smile. E mandatario ta sigui bisa cu ta hopi importante pa relaha, bishita nos playanan, scucha e sonido di parhanan, e olanan y disfruta di e trankilidad di naturalesa. Pasa tempo cu su famia y amigonan tambe ta un di e tipnan cu ela comparti pa por mantene un salud mental balansa.

Finalmente e mandatario a conclui cu e ser muhe ta un ser fuerte y tin abilidadnan di lider. Como hende muhe of mama, ta haci di un cas, un hogar. No ta importa e funcion, hende muhe ta hopi bon den haci hopi tarea pareu. Ademas di tur e tipnan cu mi a menciona con pa mantene un salud mental balansa, Aruba tin institucionnan cu profesionalnan cu por yuda esnan cu tin mester di dje. Minister Xiomara Maduro a termina cu un mensahe: ‘Semper kere den bo mes y corda cu den tur cos menos bon cu pasa tin algo positivo. Ta nos mester habri nos wowo y mente pa mira esey’.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio