Un hoben di 20 aña, lo a bula of a cay for di 3 piso den e parkinglot na Paseo Herencia
Palm Beach, Paseo Herencia: Diadomingo algo prome cu 7’or di anochi presencia di polis a wordo pidi cu hopi urgencia na Paseo Herencia. Pa un persona cu lo a bula of a cay for di 3 piso.
Na yegada nan ta bin topa cu un mucha homber benta riba vloer, e tabata na tino pero tabata halando rosea cu dificultad.
Mesora a pidi ambulance cu maximo urgencia.
E persona cu lo a bati alarma a conta cu e tabata den e parkinglot y a scucha un zonido duro ora e la bay mira, e la topa cu e mucha homber benta riba vloer y su situacion tabata mustra hopi delicado.
Varios unidad di polis a presenta na Paseo Herencia. Dos ambulance a tambe a yega cu urgencia.
E paramediconan hopi lihe a prepar’e y cu maximo urgencia e dos ambulancenan a sali direccion di hospital. Acompaña pa polis cu a cera caminda pa e ambulance por yega mas liher na Hospital, mirando e situacion critico cu e hoben victima ta den. Segun informacion di polis, situacion di e hoben ta hopi critico y e ta den ICU.
Investigacion lo mester deduci kiko exactamente a pasa, no ta conoci ainda si por ta trata di un intento di suicidio of homicidio. Autoridadnan concerni mas sigur lo presenta na e sitio pa haci nan Investigacion.
