WASHINGTON – Dialuna den oranan di mainta, e ex Politico Mericano y General Colin Powell a fayece. Segun su famia e lo a fayece di complicacionnan di Covid-19. Colin Powell tabata completamente vacuna, e la fayece na edad di 84 aña.
Powell tabata Secretario di Estado, durante e prome termino di George W. Bush (2001-2005). E tabata e prome Mericano di Color cu a ocupa e puesto aki. Anteriormente Powell tabata Chief of Staff y e puesto aki e la ocupa tambe durante Gulf War(1989-1993). Colin Powell a yega di ocupa varios funcionnan importante den Gobierno Mericano. Bou presidencia di Ronald Reagan e tabata pa dos aña Consehero di Seguridad Nacional Mericano. (1987-1989).
Powel tabata tin un carrera den Politica y tambe un den Forsanan Arma Mericano, den cual e tabata hopi activo. Colin Powell tabata conoci como e “Political General.”
Na final di añanan ’60 e la sirbi na Zuid Vietnam, esaki prome cu Merca a participa den e guerra contra Noord Vietnam. Na fin di añanan ’60 e la bay bek Merca y a ricibi un medalla despues di un crash cu un helicopter y e la rescata e tres ocupantenan for di e helicopter na candela.
Maske cu Powell semper tabata tin un funcion bou di e presidentenan Republicano, e ultimo añanan di su bida e la duna preferencia na e Democratanan. Na 2016 e la vota pa Hillary Clinton, pasobra segun su persona Donald Trump lo tabata un berguensa nacional.Na 2020 un biaha mas e la duna su preferencia politico na e Democratanan y a vota pa Joe Biden.
Segun famia di Colin Powell, nan a perde un casa, un tata, un welo hopi stima y Merca a perde un gran Mericano.