Na Belgica, diasabra atardi un famia a perde dos di nan yiunan y e dos muchanan aki un ora despues a wordo haya den cas di un homber conoci pa asunto di pornografia cu mucha. Polis a haya e homber na jockey y e tabata bou influencia. E procurador cu a atende cu e caso aki a laga detene e homber aki, pa motibo cu e homber ta conoci caba pa ta envolvi den asuntonan cu tin di haber cu pornografia di mucha, e homber aki lo por tabata tin malintencion cu e dos criaturanan pero a wordo descubri net na tempo.
Kelmis, Belgica:
Diasabra den careda di 6’or y mey di atardi, un famia a bira hopi preocupa na momento cu nan dos yiunan di 4 y 6 aña a bay hunga pafor cu algun mucha y no a bin bek paden. Mesora e mayornan y algun bisiña a cuminsa ta busca rond den e bario pa e dos muchanan aki. Despues di mas di un ora ta buscando, nan a scucha yoramento di un mucha muher chikito saliendo for di un apartamento den e bario.
Mesora nan a bay na e apartamento aki, pero e habitante a nenga di habri porta pa nan. E famia y e bisinjanan hopi rabia y desespera a forza e porta di e apartamento, kibra esaki y a drenta paden. E habitante, un homber tabata na jockey y den e cas nan a bin topa cu e dos muchanan. E homber a haya un bon bati di for di nan.
Polis a wordo pidi y na momento cu polis a yega ainda e homber tabata na jockey. E muchanan tabata tin nan paña bisti. E homber a keda deteni y mesora husticia a habri un investigacion pidiendo mesora pa un ordo di detencion.