Home Local Misa di apertura di Sinodo 2021 – 2023

Misa di apertura di Sinodo 2021 – 2023

SHARE

 

 

Diadomingo 17 di oktober pa 7:00pm lo tuma luga na Pro-Catedral San Francisco e apertura di Sinodo di Iglesia Catolico 2021-2023 cu e lema “Pa un Iglesia Sinodal: comunion, participacion y mision”.

Diadomingo pasa 10 di oktober den Basilica di San Pedro, Papa Francisco a duna inicio na e di XVI Asamblea General Ordinario di e sinodo di obisponan. Papa ta invita tur fiel pa: reuni, scucha y discerni bou guia di Spirito Santo e caminda cu nos mester tuma. E sinodo aki lo duna nos e oportunidad pa renoba nos compromiso pa biba den comunion cu Dios y cu nos prohimo. Tambe pa scucha e preocupacion y deseo di nos pueblo. E sinodo aki lo wordo trata den tres fase. E prome lo ta na nivel Diocesano y esaki lo tuma luga entre oktober 2021 te cu april 2022. E di dos lo ta na nivel Continental entre september 2022 te cu maart 2023. E ultimo lo ta na nivel Universal y esaki lo tuma luga oktober 2023.  

For di dialuna te cu diahuebs venidero nos clero di Aruba lo tin un conferencia virtual cu otro islanan di nos Diocesis pa trata e tema di Sinodo na nivel Diocesano. Den cuadro aki nos ta invita tur fiel pa asisti na e misa solem. E Santa Eucaristia lo keda presidi pa e representante di nos obispo aki na Aruba, esta nos Vicario Episcopal reverendo p. Andres Makowiec y lo wordo concelebra pa clero di Aruba.