Home Politics Minister Xiomara Maduro a ricibi bishita di representantenan di FUNARI

Minister Xiomara Maduro a ricibi bishita di representantenan di FUNARI

SHARE

ORANJESTAD – Diaranson, minister di Finansa y Cultura, Sra. Xiomara Maduro, a ricibi Sra. Lila Mackay y Sra. Gabriella Kock-Helder di Fundacion Arubano pa Invalidonan (FUNARI). E meta di e bishita aki tabata pa minister Maduro sera conoci cu locual ta e trabounan di FUNARI, pero tambe locual ainda mester wordo haci pa cu esnan cu tin un of mas limitacion. 

Durante e mainta aki, representantenan di FUNARI a haci entrega di un rapport na minister Maduro den cual nan ta describi nan metanan, mision y vision pa esnan cu tin un limitacion aki na Aruba. Tambe a comparti ideanan di con por yuda sostene esnan cu limitacion di un manera mas efectivo pero tambe bin cu ideanan nobo di con pa yega na esnan cu tin un limitacion pero cual ainda ta desconoci serca instancianan concerni.

FUNARI tin como meta pa yuda esnan cu limitacion pa pone un fin na e isolacion den cual nan ta encontra nan mes. Esaki nan kier logra por medio di trabou cual lo yuda esnan cu limitacion pa sali for di e soledad cu nan ta aden y asina animanan pa usa nan mannan y pianan nobo, pero tambe siña hobenan cu limitacion con nan por mantene nan mes. 

Na final di e bishita, FUNARI a haci entrega di un obsekio na minister Maduro pa asina mustra nan gradicimento di por a reuni cu e mandatario. Na su turno, minister Maduro a gradici FUNARI pa nan bishita y a deseanan tur clase di exito den e tarea di salvaguardia e derechonan di esnan cu limitacion aki na Aruba y tambe pa kita tur obstaculo cu por tin riba nan caminda pa haci cu nan hendenan por participa activamente den nos sociedad.