Home Corte Den Corte a trata caso di relacion sexual entre dos mucha menor...

Den Corte a trata caso di relacion sexual entre dos mucha menor di edad

SHARE

ORANJESTAD – Awe mainta Corte di Husticia a trata e caso penal cu Ministerio Publico a cuminsa contra un hoben di 18 aña, kende ta wordo acusa di a abusa di un mucha muher di 12 aña.

Aruba Native por a compronde cu tempo cu e caso aki a sosode, e hoben B.(18) tabatin 15 aña y el a bisa den Corte cu e mucha muher a bis’e cu e tabatin 15 aña. Despues e mucha muher a bis’e cu e tin 12 aña.

Fiscal a acusa B. di a abusa di un mucha muher menor di 12 aña y di a haci actonan inmoral cun’e entre Januari 2018 y Juli 2019.

Hues a haci B. un serie di pregunta riba e caso. Segun B. na Januari 2018, e no a conoce e mucha muher sino na Januari 2019. Ta despues cu e mucha su mama a haci denuncia, el a distancia di e mucha cu tabata su chick. Segun B. ta via facebook nan a conoce otro. E tempo ey e mucha a bis’e cu e tin 15 aña mientras cu B. tabatin 15 aña. Despues e mucha muher a bis’e cu su edad mes ta 12 aña.

Hues a mustra cu dia 8 Juli 2019 e mama di e mucha a haci denuncia. Segun e mama, 1 Juli 2019 e yiu muher a whatsapp cu e tabata cuida baby pero despues a resulta cu e tabata serca B. na su cas. Despues B. a hib’e cas. E mama a bay coba den cellular di su yiu y a mira potret di B. sunu. Segun B., e mucha tambe a manda potret sunu p’e. E mucha a bisa miembronan di KZP cu e tabatin relacion sexual cu B.

For di e interogacion den Corte a sali na cla cu na Januari 2019 nan tabatin nan promer relacion sexual. Hues a bisa cu investigacion riba cellular di e mucha ta mustra cu el a manda un cantidad di videonan di dje sunu pa B.

Fiscal ta haya cu e relato di KZP ta papia di 2018 tempo cu e mucha no tabatin 12 aña. Fiscal no ta haya esaki proba. El a bisa cu e hoben B. ta papia di Januari 2019. Fiscal a sigui bisa cu e videonan di relacion sexual cu ta poni cu ta na Mei 2018 ta robez. Nan mester ta Mei 2019.

Fiscal ta haya legalmente proba cu entre December 2018 y Juli 2019 cu B., e tempo ey 15 aña a tene relacion sexual cu e mucha di 12 aña. Esaki ta algo serio. Fiscal a bisa cu e inmoralidad na Aruba ta un problema grandi. E caso aki ta serio pasobra a haci videonan cu no sa unda esakinan ta bay para.

Fiscal a bisa cu e ta tene cuenta cu B. mes tabata menor di edad. El a exigi castigo condicional di 1 luna di prison cu tempo di prueba 2 aña. Fiscal a bisa cu esaki ta un aviso.

Hues a bisa cu e ta bay studia e caso y 28 October 2021 lo tin sentencia.