Empleadonan di Aruba Bank ta aporta na e Proyecto di “Menstrual Hygiene Products” di Rode Kruis Aruba

Oranjestad- October 11, 2021 – Estudionan ta indica cu (1) den cuatro (4) hende muher den nos comunidad, cu haya nan menstruacion, no por carga e gasto pa e productonan sanitario necesario. Cu esaki den mente Rode Kruis Aruba a inicia e Proyecto: “Menstrual Hygiene Products”.

E proyecto ta yuda conscientisa e comunidad ariba e problematica aki y tambe ta yuda colecta producto di hygiene femenino pa Rode Kruis por traha pakete pa entrega na teeners y mama hoben, mensualmente.

Aruba Bank ta consisti di 75% empleadonan femenino y a wak e iniciativa aki como un bunita oportunidad pa pa duna un man na un grupo di damas cu mester di ayudo.

Entre e empleadonan a logra colecta un cantidad substancial di producto di hygiene femenino pa aporta na e causa.

Gerencia di Aruba Bank ta orguyoso di e sosten y e comprencion cu e coleganan femenino y masculino a duna na e proyecto y ta aplaudi e iniciativa aki di Rode Kruis Aruba.