Home Dutch Kingdom Dos biaha 30 aña di castigo prison pa asesinato di e abogado...

Dos biaha 30 aña di castigo prison pa asesinato di e abogado Derk Wiersum relaciona cu caso Marengo

SHARE

Amsterdam, Hulanda:

Corte ta duna dos biaha 30 aña castigo di prison, pa likidacion di e abogado Derk Wiersum, kende tabata representa e testigo principal Nabil B. den e conocido caso Marengo likidatie proces. 

Derk Wiersum a wordo likida riba 18 september 2019, dilanti su cas na Amsterdam-Buitenveldert, den careda di 7’or y mey di mainta, net na momento cu e la bay pa subi den su auto, e la ricibi 6 tiro cu consecuencianan fatal. E asesinato aki tabata un shock pa henter e pueblo Hulandes y muy en particular esnan cu tin un funcion den husticia.

E dos personanan sospechoso di a likida Derk Wiersum ta Giermo B. (37) biba na Almere y Moreno B. (32) di Rotterdam. Despues di e likidacion mesora polis a cuminsa cu un investigacion grandi cu a conduci na e dos sospechosonan aki.  Por medio di grabacionnan di camaranan y tapmento di combersacionnan, polis a yega na suficiente prueba contra e dos sospechosonan aki cu a likida Wiersum.

Un di tres sospechoso ta Anouar T.  kende supuestamente lo ta un primo di Ridouan Taghi. Anouar lo a entrega e personanan aki autonan procedente di ladronicia. E sospechosonan segun husticia a ehecuta e likidacion aki, pero di comienso te na final a keda desmenti, segun nan, nan dos no tin nada di haber cu e likidacion aki. Tambe e dos personanan aki a haci uso di nan derecho di keda keto.

Segun corte e dos sospechosonan aki ta e personanan cu a ehecuta e likidacion. Algun siman prome cu e likidacion, varios auto a wordo horta y e autonan horta aki a wordo señala den e bario di Buitenveldert caminda e abogado tabata biba, esaki tabata pa nan a conoce e bario mihor, prome cu nan a ehecuta nan plan pa asesina Wiersum.

Den e autonan horta, incluyendo e auto cu nan a uza pa huy, autoridad a bin haya rastronan di DNA di e dos sospechosonan aki. Tambe por medio di informacionnan di telecom nan a bin confirma cu e dos sospechosonan aki tabata move frecuentemente den becindario di e cas di Wiersum y cu durante e periodo prome cu e likidacion e dos sospechosonan tabata  constantemente den contacto cu. For di e investigacion haci a bin sali na cla, cu hopi lihe despues di e asesinato di golpi e dos sospechosonan aki a ricibi un suma grandi di placa cash. For di tapmento di nan combersacionnan a sali na cla cu ta nan dos ta envolvi den e likidacion di e abogado Derk Wiersum.

Segun corte por medio di e pruebanan nan no por a confirma cua di e sospechosonan tabata e chauffeur y cua ta esun cu a los e tironan, ambos a wordo sentencia pa asesinato. Husticia a exigi levenslang, pero corte no por a dicta esaki, pa motibo cu e castigo maximo pa un asesinato ta 30 aña.

Segun Corte e dos personanan aki no tabata na altura cu tabata trata di e abogado di e testigo principal  Nabil B. den e caso grandi di Marengo Liquidatie Proces. Un par di tempo prome e ruman di e testigo principal Nabil B. a wordo likida y ultimo su persona di confiansa, e journalista di crimen Peter R. de Vries.