Recientemente Aruba Tourism Authoriry (A.T.A.) a invita pa bishita Aruba un grupo di influencer Europeo – di Hulanda y Reino Uni, kende ta popular entre viahero cu ta inverti sumanan cuantioso den nan experiencianan turistico. E influencernan aki ta conoci pa nan contenidonan creativo y di calidad, y tin mas di 300 mil siguido riba Instagram.
E oficina di A.T.A. na Hulanda a organisa e bishita como un colaboracion creativo y a inclui tres influencer specialisa den viahe di Hulanda y Reino Uni, plus un fotografo y un influencer di Hulanda cu ta combina video cu grabacionnan haci cu drone. Nan a cera conoci cu diferente luga cu tin un encanto special, cu ta ofrece bista y escenarionan bunita cu ta inspira experiencianan autentico y colorido pa asina crea contenido unico pa nan paginanan di Instagram y pa nan blognan. Den e proceso nan a crea contenido tambe pa e canalnan Hulandes di Aruba Tourism Authority riba rednan social. @aruba.nl
Tabata di bishita na Aruba, Naomi Louwerens (Authentic Chica), kende ta un influencer riba Instagram y un specialista den mercadeo pa medionan social; e blogernan specialisa den viahe Hanna Thomas (Solar Powered Blonde) di Reino Uni y Lieke Pijnappels (Little Wanderbook), como tambe e fotografo Remke Vet y e camarografo y “drone influencer” Boyan Ortse (Boyanoo).
Probechando di e presencia di e influencernan, A.T.A. a incorpora un elemento extra di “branding” hunto cu e marcanan di moda den e segmento “indie”, esta The Little Green Bag y Cowboys Bag. E marcanan aki a comparti y ta publicando e contenido crea na Aruba riba nan rednan social tambe.
E representante di A.T.A. Amayra Boekhoudt a organisa y coordina e programa di bishita pa explora algun di e beachnan mas bunita, rinconnan “scondi” den Parke Nacional Arikok, e muralnan den cayanan di San Nicolas, y ofertanan culinario, incluyendo un picnic riba beach. A ofrece nan tambe un experiencia di estadia varia, pa cual nan a keda algun dia na Boardwalk Boutique Hotel, un compleho di apartamento chikito cu un caracter tropical moderno y acogedor, y e resto di dianan nan a disfruta memey di e area di hotelnan riba Palm Beach rondona pa restaurant, tienda y entretenimento na Hilton Aruba Caribbean Resort & Casino.
Riba rednan social y nan websitenan por admira e contenido cu nan a crea y publica durante y despues di nan estadia na Aruba.
